Prezidente Federasaun Futeból Timor-Leste, Nilton Telmo Gusmão hatete, Prezidente Repúblika, José Ramos Horta, hato'o ona konvite ba Prezidente FIFA, Gianni Infantino, atu halo vizita mai Timor-Leste.

"Ami mos komunika intensiva ho Prezidente  FIFA. Tan ne'e Prezidente FIFA hakarak mai, maibé depois Kopa Mundiál iha Amerika, Mexico ho Canada, nia sei mai ita nia rai. Nia mai hakarak halo lansamentu fatuk dahuluk ba ita nia estádiu foun. Tanba FIFA sei ajudu fundu atu harii estádiu,” Katak nia ba jornalista sira, iha salaun City 8 Manleuana, Kinta (05/03).

Prosesu  harii estádiu foun, Nilton dehan, parte governu hanesan MJDAK, MJ no MPIE no FFTL ida-idak halo hela nia servisu hodi bele konklui prosesu ba rai.

"Ami fiar to'o iha nia loron ita sei lansa fatuk dahuluk. Maibé agora ita tenke rezolve servisu uma laran,” Nia afirma.

Kona-ba rai, prezidente Nilton informa, rai ne'e responsabilidade governu nian, federasaun husu atu utiliza hodi harii infraestrutura ida adekuadu ba sosiedade hadomi futeból atu asiste futeból iha dignu.

“Ita kontinua komunika atu hetan solusaun ruma ba rai, se la konstrui iha Tasi-tolu,  tenke iha fatin seluk, tan ne'e mak tenke hatudu fatin ne'ebe ita atu konstrui infraestrutura desportu nian ida ho padraun internasionál,” Katak nia.

Lideransa FFTL ne'e argumenta, Governu fo apoiu total, tanba governu mos disponibiliza fundu atu harii estádiu, maibé agora problema mak rai.