Tuir observasaun husi Online INDEPENDENTE nian iha terenu haree katak, iha portaun parte leste no parte norte nakonu ho komunidade sira ne'ebé hein atu bele asesu ba estadiu laran, maske rai manas komunidade sira ho entuziasmu nafatin hodi hein.

Komunidade, Franscisco Sousa, hatete, nia parte to'o sedu iha estadiu munisipiu dili, tamba hakarak atu tur iha oin hodi bele asesu ba jogu ho di'ak

"Ami ohin loron mai sedu hein iha portaun, tamba hakarak asesu ba estadiu laran, hodi bele asiste jogu portugal kontra timor-leste,"dehan nia ba jornalista jornal independente, iha resintu estadiu munisipiu dili, sabadu (19/07).

Nia informa jogu ida ne'e foin ba dala uluk akontese iha Timor-Leste, taNba ne'e sira entuziasmu tebes hakarak suporta TL hodi bele manan jogu refere.

"Ita hotu hatene katak jogu ne'e foin ba dala uluk realiza iha Timor-Leste, tamba ne'e hanesan timoroan hakarak asesu ba estadiu atu bele fó suporta masimu ba ekipa rua ne'ebé sei joga,"nia haktuir.

Entretantu, situasaun iha estadiu munisipal Dili, la’o ho hakmatek, tamba hetan seguransa masimu husi husi PNTL.

Aleinde ne'e mós PNTL liu husi diresaun tranzitu nasionál, blokeia estrada husi diresaun lampu merah 88 ba diresaun Merkadu Lama Estatua Francisco Xavier do Amaral.

Entretantu, Jogu refere abertura iha sabado ne’e no sei termina iha loron 27 fulan-Jullu tinan ne’e.