Portavoz Sentru Integradu Jestaun Krize (SIJK) Dr. Sergio Lobo hatete, Ekipa Vizilansia Epidemiolojika halo ona investigasaun ba ema sira ne’ebé kontaktu Pessoal Saúde konfirmadu COVID-19.

“Ema sira ne’ebé kontaktu Pessoal Saúde ne’e kompostu husi nia familia na’in 10, nia kolega na’in lima no professional saúde na’in 20,”dehan nia iha konferensia imprensa iha CCD, ohin.

Nia halo klarifikasaun katak Pessoal Saúde ne’ebé pozitivu normalmente tama iha kuerentena loron 14 maibé bainhira la hatudu sintomas sira bele fila ona ba uma.

Dr.Sergio esplika, amostra ne’ebé laboratoriu foti atu uza hanesan amostra ba validasaun tanba ne’e maka la fó prioridade ba ezame laboratóriu.

Maski rezultadu laboratóriu hatudu karga viral ne’ebé ki’ik tebes, husi experiensia ida ne’e SIJK muda tiha ona prosedimentu padraun ba professionál saúde sira iha kuerentena katak sira hotu tenke teste laboratoriu molok sai husi kuerentena.