29 Setembru: Feto Ida Mate ho Covid-19 iha Baukau, Positivu Foun Tun ba 10 Featured

By Setembru 29, 2021 428
Ema mate. Foto;Dok. Ema mate. Foto;Dok.

DILI: Sala Situasaun Sentru Integradu Jestaun Krize (SIJK) ohin (29/09) relata, ekipa konjunta saúde rejista feto ida mate ho Covid-19 iha Izolamentu Baukau,  nune’e positivu foun tun ba na’in 10.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun reduz, kompara ho horiseik, maibé kazu rekuperadu nafatin barak liu kazu detetatu foun.

Enkuantu, númeru ema ne’ebé mate iha na’in  ida (1). 93,% ka (107/115) husi ema ne’ebé mate ho Covid-19, seiduak vasina kompletu.

Númeru ema ne’ebé hala’o tratamentu ospitalizadu reduz tan, kompara ho horiseik.

Husi kazu detetadu 10 ne’e, iha Dili kazu 6, Manatuto kazu ida (1) no Vikeke iha kazu rua (2).

“Husi totál kazu detetadu foun ohin, iha kazu 5 ka 50% mak hatudu sintomas, kazu tolu (3) ka 30% simu ona vasina kompletu no kazu rua (2) ka 20% simu ona doze dahuluk,”dehan nia iha komunikadu ne’ebé Online INDEPENDENTE asesu, kuarta ne’e.

Aleinde, SIJK mós rejista pasiente ne’ebé rekupera husi Covid-19 iha na’in 69 no kazu ativu ne’ebé baixa hela iha Izolamentu hamutuk na’in 778.

Enkuantu, totál komulativu kazu konfirmadu sura husi loron 21 fulan-Marsu tinan 2020 to’o loron 29 fulan-Setembru tinan 2021 hamutuk 19.455.

Entretantu, ba kazu mate, Rui relata, sidadaun Timor-oan feto ida ho idade 23 hela iha Munisipiu Baukau no seidauk simu vasina. Diagnóstikadu sindroma insufisiénsia respiratória aguda (SIRA) tanba Covid-19 iha loron 22 fulan-Setembru tinan 2021. Pasiente iha mós problema cardiopatia congenital, nune’e iha tuku 13:10, loron 28 fulan-Setembru pasiente hakotu-iis.

Tanba ne’e, família kolabora ona ho ekipa saúde, hodi hala’o funeral tuir protokolu ne’ebé adopta iha Timor-Leste.

Ho nune’e, tuir dadus husi SIJK, total ema ne’ebé mate ho Covid-19 iha TL hamutuk na’in 115.

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV