27 Agosto: Ema Na’in 2 Mate, Kazu Foun Covid-19 iha Na’in 357

By Agostu 27, 2021 443
Ema mate. Foto:Dok/Independente. Ema mate. Foto:Dok/Independente.

DILI: Sala Situasaun sentru Integradu Jestaun Krize (SIJK) ohin (27/08) relata, ekipa konjunta saúde rejista tan sidadaun Timor-Oan na’in rua (2) mate ho Covid-19 iha Sala Izolamentu Vera Crus. Nune’e, kazu foun hamutuk 357.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, sidadaun na’in rua ne’ebé mate ho identidade mane hotu, husi idade tinan 78 no 58.

“Kazu mate dahuluk, mane ho idade tinan 78, hela iha Dili no seidauk hetan vasina. Nune’e, iha loron 24 fulan-Agostu tinan 2021 diagnóstikadu sindroma insufisiénsia respiratória aguda (SIRA) tanba Covid-19, no hahú halo tratamento iha Vera Cruz, iha loron ne’e kedas. Hafoin horikalan (26/08) oras tuku 19:10 matebian hakotu-iis,”dehan nia iha komunikadu ne’ebé Online INDEPENDENTE asesu, sesta ne’e.

Enkuantu, kazu daruak, mane ho idade tinan 58, hela iha Munisípiu Bobonaro no sidadaun refere seidauk hetan vasina. Nune’e, iha loron 21 fulan-Agostu tinan 2021, diagnóstikadu sindroma insufisiénsia respiratória aguda (SIRA) tanba Covid-19, no hahú halo tratamento iha Lahane, iha loron ne’e kedas.

Ho nune’e, horikalan (26/08) iha oras tuku 19:10 matebian hakotu iis.

Tanba ne’e, familia kordena hela ho ekipa saúde sira atu hala’o funeral tuir protokolu ne’ebé adopta iha Timor-Leste.

 Entretantu, kazu foun ne’ebé relata ohin, iha Kapital Dili na’in 228, Baucau 24, Covalima 29, Vikeke 25, Ainaro 18, Bobonaro 5, Lautem 9, Likisa 8, Manatuto 3 no Manufahi 8.

Husi kazu detetadu foun ohin, iha kazu 108 (30%) iha ona vasina kompletu no 40 (11%) hetan ona vasina doze dahuluk.

Aleinde, SIJK mós rejista pasiente ne’ebé rekupera husi Covid-19 hamutuk na’in 185 no kazu ativu iha Sala Izolamentu ho total hamutuk 4.373.

Totál Komulativu kazu konfirmadu sura husi loron 21 fulan-Marsu tinan 2020 to’o loron 27 fulan-Agostus tinan 2021 hamutuk 15.960.

Enkuantu, total kazu mate ho Covid-19 iha Timor-Leste hamutuk 58.

Husi horiseik (26/08) mai ohin teste PCR ne'ebé Laboratóriu Nasionál Saúde halo hamutuk 938 ne’ebé kompostu husi, Vijilánsia sentinela na’in 73, Contact tracing 239, Random Screening 337, Viájen sai husi serka sanitária husi Dili 254, Viájen internasionál 9 no Follow up iha kuarentena 26. Nune’e, total PCR ne’ebé halo iha Munisipiu sira seluk, RAEOA no HNGV hamutuk  498.

Ohin, iha Izolamentu Vera Crus halo tratamentu ba kazu detetadu hamutuk 86.

SIJK mós husu ba sidadaun hotu atu kumpri regras hanesa fase liman bebeik, uza maskara, labele halibur malu liu na’in sanulu ba leten, atu nune’e prevene moras Covid-19 ho variante foun ho naran Delta.

 

Asistente Editor: Saturnina da Costa

Rate this item
(0 votes)
Last modified on Tersa, 31 Agostu 2021 11:53
Saturnina da Costa

Jornalista Jornal Independente

https://independente.tl

Independente Digital TV