Segunda, 20 Setembru 2021 | Login
Vasina kontra Covid-19. Foto:Dok. Vasina kontra Covid-19. Foto:Dok.

15 Setembru: Positivu Foun Tun ba 71, Mate Na’in Rua

DILI: Sala Situasaun Sentru Integradu ba Jestaun Krize (SIJK) ohin (15/09) relata, ekipa konjunta saúde rejista tan kazu positivu foun Covid-19 tun ba na’in 71 kompara ho loron horseik (14/09) iha na’in 118, no ema ne’ebé  mate iha na’in rua (2).

Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araujo informa, Munisipiu Dili kontinua rejista númeru kazu boot liu kompara ho Munisipiu sira seluk.

Husi total kazu detetadu 71, iha Dili deteta kazu 34, Bobonaro kazu 7, Baukau kazu 11, Ainaro kazu 5, Kovalima kazu 1, Bobonaro kazu 7, Likisa kazu 5, no Manatuto kazu 8.

“Husi kazu detetadu ne’e, na’in 56 ka 78,9% hatudu sintomas, na’in 18 ka 25% simu ona vasina kompletu no na’in 8 ka 11% simu ona vasina doze dahuluk,”dehan nia iha komunikadu ne’ebé Online INDEPENDENTE asesu kuarta ne’e.

Maske deteta kazu pozitivu, maibé SIJK mós rejista kazu rekuperadu ne’ebé barak liu kazu pozitivu foun. Iha 14 Setembru ema na’in 256 mak rekupera. Nune’e kazu ativu ne’ebé iha Izolamentu hamutuk 2.756.

Total komulativu kazu konfirmadu sura husi loron 21 fulan-Marsu tinan 2020 to’o loron 15 fulan-Setembru tinan 2021 hamutuk 18.786

Ba kazu mate, Rui informa, na’in ida simu ona vasina doze dahuluk no na’in ida seluk seidauk simu vasina.

Kazu dahuluk, mane ho idade 44, hela iha Dili, simu ona vasina doze dahuluk, diagnostikadu Sindroma Insufisiensia Respiratoria Aguda (SIRA) tanba Covid-19. Matebian sofre mós moras Asidente Vascular Celebral (AVC) iskémiku, iha loron 13 fulan-Setembru. Pasiente hala’o tratamentu iha izolamentu Vera Crus, nunee’e horseik (14/09) loraik tuku 15.20, hakotu-iis.

“Familia kolabora ho ekipa saúde atu hala’o funeral tuir protokolu ne’ebé adota iha Timor-Leste,” dehan Rui.

Kazu daruak, mane ho idade tinan 68, seidauk vasina, hela iha Dili, diagnostikadu iha ho SIRA tanba Covid-19 Iha HNGV, iha loron 2 fulan-Setembru. Iha loron ne’e kedas pasiente iis kotu iha tuku 17.25.

Ba matebian ne’e, Rui hatete, familia kolabora ho ekipa saúde atu hala’o funeral tuir protokolu ne’ebé adota iha TL.

Nune’e, tuir dadus total ema ne’ebé mate ho Covid-19 iha Timor-Leste hamutuk na’in 100.

Entretantu, husi horseik (14/09) mai ohin teste PCR ne’ebé Laboratoriu Nasional Saúde halo iha Dili hamutuk na’in 283 kompostu husi Vijilansia sentinela na’in 16, Contact tracing na’in 5, Random screening  na’in 41, Viajen sai husi serka sanitaria Dili na’in 105, Viajen internasional na’in 7 no Follow up iha kuarentena na’in 109.

Teste PCR ne’ebé halo iha Munisipiu sira seluk, RAEOA no HNGV hamutuk na’in 385. Iha loron 15 fulan-Setembru Izolamentu Vera Crus, Lahane, HNGV no fatin seluk iha teritoriu laran tomak halo tratamentu hospitalizadu ba kazu detetadu hamutuk na’in 74 kompostu husi kazu grave na’in 12, moderadu na’in 45 no kazu leve na’in 17.

Read 118 times
Rate this item
(0 votes)

About Author