13 Outubru: Positivu Foun Covid-19 iha Na’in Sia

By Outubru 13, 2021 304
Corona Virus. Foto:Google. Corona Virus. Foto:Google.

DILI: Sala Situasaun Sentru Integradu Jestaun Krize (SIJK) ohin (13/10) relata, ekipa konjunta saúde rejista hikas kazu positivu foun Covid-19 hamutuk na’in sia (9).

Husi kazu detetadu sia (9) ne’e, iha Dili na’in rua (2), Kovalima na’in hat (4) no Vikeke na’in tolu (3).

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun reduz, komparaa ho kazu rekuperadu nafatin aumenta.

“Ema ne’ebé halo tratamentu óspitalizadu iha Izolamentu reduz kompara ho loron horseik (12/10), nune’e dadus ne’ebé iha, hatudu munisipiu lima (5) laiha ona kazu ativu, enkuantu Munisipiu lima (5) seluk sei iha kazu esporádiku,”dehan nia iha komunikadu ne’ebé Online INDEPENDENTE asesu, kuarta ne’e.

Nune’e, iha Munisipiu Dili, Baukau no Rejiaun Administrativu Espesial Oekuse Ambeno (RAEOA) mak sei iha kazu cluster.

Entretantu, populasaun elejivel iha Kapital Dili ne’ebé simu ona vasina doze kompletu hamutuk pursentu 70 (70%).

Rui esplika, husi totál kazu detetadu foun ohin, kazu lima (5) ka 55,5% mak hatudu sintomas no kazu rua (2) ka 22% simu ona vasina doze kompletu.

Ho nune’e, SIJK mós rejista pasiente ne’ebé rekupera husi moras Covid-19 iha na’in 38 no kazu ativu ne’ebé iha Izolamentu hamutuk na’in 133.

Totál komulativu kazu konfirmadu sura husi loron 21 fulan-Marsu tinan 2020 to’o loron 13 fulan-Outubru tinan 2021 hamutuk 19.690.

Entretantu, husi horiseik (12/10) mai ohin teste ne'ebé Laboratóriu Nasionál Saúde halo iha Dili hamutuk 211, kompostu husi, Random Screening na’in 18, Viajen internasional na’in 188 no follow up iha kuarentena na’in lima (5).

Enkuantu, teste PCR ne’ebé halo horiseik iha Munisípiu sira seluk, RAEOA no HNGV hamutuk 171

Ho nune’e, Izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu hamutuk na’in 14, kompostu husi kazu grave na’in rua (2), kazu moderadu na’in neen (6) no kazu leve na’in neen (6).

 

Asistente Editor: Saturnina da Costa

Rate this item
(0 votes)
Saturnina da Costa

Jornalista Jornal Independente

https://independente.tl

Independente Digital TV