03 Outubru: Positivu Foun Covid-19 iha 19 Featured

By Outubru 03, 2021 391
Rejultadu teste hatudu positivu Covid-19. Foto:Dok. Rejultadu teste hatudu positivu Covid-19. Foto:Dok.

DILI: Sala Situasaun Sentru Integradu Jestaun Krize (SIJK) ohin (03/10) relata, ekipa konjunta saúde deteta tan kazu positivu foun Covid-19 hamutuk na’in 19.

Kordenador Forsa-Tarefas ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo hatete, númeru kazu detetadu foun ohin reduz kompara ho horiseik (02/10) no kazu rekuperadu mós aumenta.

Husi kazu detetadu 19 ne’e, iha Dili kazu 6, Baukau kazu 11 no RAEOA iha kazu 2.

“Husi totál kazu detetadu foun ohin, kazu 8 ka 47,3% mak hatudu sintomás, kazu 1 ka 5% simu ona vasina doze kompletu no kazu 5 ka 26% simu ona vasina doze dahuluk,”dehan  nia komunikadu ne’ebé Online INDEPENDENTE asesu, domingo ne’e.

Aleinde, SIJK mós rejista kazu rekuperadu hamutuk na’in 97 no kazu ativu ne’ebé baixa hela iha Izolamentu hamutuk 672.

Totál komulativu kazu konfirmadu sura husi loron 21 fulan-Marsu tinan 2020 to’o loron 03 fulan-Outubru tinan 2021 hamutuk 19.582.

Entretantu, husi horseik (02/10) mai ohin teste PCR ne’ebé Laboratóriu Nasional Saúde halo iha Dili hamutuk 107 kompostu husi, Vijilansia sentinela na’in 3, Random screening na’in 4, Viajen sai husi serka sanitaria husi Dili na’in 25, Viajen internasional na’in 61 no Follow up iha kuarentena hamutuk na’in 24.

Enkuantu, teste PCR ne’ebé halo horseik iha munisipiu sira seluk, RAEOA no HNGV hamutuk na’in 75.

Rate this item
(0 votes)
Last modified on Segunda, 04 Outubru 2021 19:59
Saturnina da Costa

Jornalista Jornal Independente

https://independente.tl

Independente Digital TV