TDD deside adia prosesu julgamentu ba kazu kontra bandu ba 1 Juñu 2017 tuku 4:30 loraik.

“Audensia julgamentu ne’e Tribunál labele halo bainhira Advogadu ka Defensór Públiku laiha atu defende ba nia kliente,” dehan Juiza ne’ebé kaer prosesu Maria Solana iha sala audensia TDD.

Tuir akuzasaun husi Ministériu Públiku ne’ebé Tribunál lee sai katak, iha 14 Marsu 2016 tuku 03:30 membru PNTL, Komandante Mauzinho ho nia Ofisial Eduardo, diretamente ba Metiaut. Iha ne’eba sira hetan ro ida, Anugrah, ne’ebé tula ikan maizumenus kilograma 900. Ikan ne’e entrega ba Timor-oan ida, arguidu Agapito Xavier  Lino hodi fa’an.

Bainhira hala’o pasa revista, membru PNTL identifika ema Indonezia na’in tolu, arguidu Ridwan, Rasyid no Abdul, laiha dokumentu ruma kona-ba ro no ikan. So Ridwan de’it mak iha pasaporte maibé la tau viza.

Haree ba ida ne’e, polisia halo detensaun ba arguidu sira no TDD halo primeiru interogatoriu judisial no iha tempu hanesan aplika termu identidade ba rezidensia no aplika medida koasaun aprezentsaun periodika ba arguidu sira hodi haruka arguidu sira aprezenta an iha edifisiu PNTL Kaikoli kada loron, husi tuku 09 to’o tuku 19:00.

Iha 15 Marsu 2016, Polisia Sientifika Investigasaun Kriminal Nasional, halo termu entrega objetu aprendidu ba membru Unidade Polisia Maritima, arguidu ho inisial DI ne’ebe turnu ho nia xefe turnu, arguidu AJ.

Arguidu Ridwan, Rasyid no Abdul hahú aprezenta an periodikamente kada loron iha Postu Polisia Kaikoli-Dili iha loron 16 Marsu to’o 31 Marsu 2016, maibé iha 1 Abril 2016 arguidu nain tolu la ba aprezenta an iha Posto Polisia Kaikoli. Arguidu Ridwan ba fó hatene hela ba arguidu AJ katak nia prosesu hotu ona maibé tanba nia ro sei a’at entaun nia hadia tiha mak nia ba nia rai.

Iha 2 Abril 2016 maizumenus tuku 10:00, arguidu na’in tolu ba hasoru-malu ho arguidu AJ no DI hodi hatete katak sira-nia prosesu hotu ona no fó obrigadu tanba durante arguidu sira hela iha Postu UPM Sional, arguidu AJ ho nia maluk sira husi UPM haree di’ak sira. Arguidu sira lori sai sira-nia ro no fila fali ba sira-nia rai Alor-Indonezia.

Iha 17 Juñu 2016, membru UPM ho inisial CA, DC no AD sai husi Postu Sional ho karreta UPM ba tasi-ibun area Becari, Matiaut hetan ro ida ho naran Anugerah ne’ebe arguidu sira uza para hela iha tasi laran nune’e emediatu informa ba Komandante Postu Sional no Komandante hasai orden atu lori ro ne’e mai iha Postu Sional hodi halo identifikasaun.

MP akuza, konsekuensia husi arguidu Ridwna, Rasyit, Abdul no Agapito Xavier Lino nia hahalok ne’e halo estadu TL hetan prezuizu ba taxa impostu ne’ebé arguidu sira tenke selu.

“Arguidu Ridwna, Rasyit no Abdul hatene momoos katak hatama ikan husi Alor mai Timor-Leste tenke liu husi Alfandega no Karantina hodi selu impostu ba estadu maibé arguidu sira halai husi dalan refere,” akuza MP.

MP deklara, arguidu  Ridwna, Rasyit no Abdul ho konsensia rasik hatama ikan la liu husi alfandega no karantina hodi desvia selu impostu ka taxa ba estadu TL dala haat ona.

Liu tan MP dehan, konsekunsia husi arguidu AJ no DI nia hahalok halo kredibilidade instituisaun PNTL espesifika ba UPM nian monu.

MP deklara, arguidu sira halo forma ho livre, liberdamente no konsinte katak hahalok sira ne’ebé sira halo kontra lei maibé sira atua nafatin, ho nune’e arguidu Agapito, Ridwan, Rasyit no Abdul hanesan Ko-autor Material konsumadu, komete krimi kontra bandu haat ne’ebé previstu iha artigu 316 Nú.1 Kodigu Penal.

“Arguidu Agapito Xavier Lino hatene momoos katak arguidu Ridwna, Rasyit no Abdul hatama ikan ho illegalmente, la liu husi alfandega no karantina maibé arguidu Agapito simu no kolabora hodi sosa ikan sira ne’e kada kilo $2 dolar hodi fa’an tutan,” katak MP.

MP akuza arguidu Ridwan, Rasyit no Abdul hanesan ko-autor material ho forma konsumada komete krime dezovidensia ne’ebé previstu iha artigu 144 kodigo penal, no Arguidu AJ no DI hanesan Ko-autoria ne’ebé komete krime Prevarikasaun Funsionariu ne’ebé previstu iha artigu 278 Nú.1 Kodigu Penal.