Tersa, 11 Maiu 2021 | Login
×

Erro

An error occured during data fetch from google.com: Error calling GET https://www.googleapis.com/analytics/v3/data/ga?ids=ga%3A138150919&start-date=2017-01-15&end-date=2021-05-10&metrics=ga%3Avisits&dimensions=ga%3Ayear&start-index=1&max-results=1000: (403) Quota Error: profileId ga:138150919 has exceeded the daily request limit.
Ilustrasaun Lanu-ten tama prizaun Ilustrasaun Lanu-ten tama prizaun

Tanba Lanu AS Ameasadu Tama Prizaun Tinan Ida

DILI: Arguidu AS ameasa tama prizaun tinan ida no suspende ba tinan rua, tanba komete krime ofensa integridade fíziku simples ho violénsia doméstika hafoin hemu lanu.

Tuir akuzasaun husi ministériu públiku, iha loron 9 Agostu 2015, maizumenus 03:00 madrugada iha Bidau, fila husi festa ho kondisaun lanu arguidu tebe odamatan hodi bolu lezada, entaun lezada hadeer ba loke odamatan.

Hotu tiha, arguidu ba fanu nia oan iha kama leten, entaun lezada husu ba arguidu dehan tanba saida? Rona ida ne’e, arguidu nervozu foti kadeira atu baku lezada, maibé lezada tahan ho liman la konsege kona nia isin. Nune’e, arguidu kontinua foti kadeira baku ba lezada kona nia kotuk laran no tilun hun.

Hataan ba akuzasaun ne’e, arguidu mós deklara ba Tribunál katak faktu ne’e balu loos no balun sala. Nia la tebe odamatan no la fanu labarik, maibé loos mak foti duni kadeira no baku ba kabas, la’ós iha tilun-hun.

Arguidu mós deklara katak, iha momentu ne’e lezada mós hetan kanek, iha tilun hun, maibé arguidu la hatene tanba lanu.

“Depois problema ne’e ami hirus malu durante fulan 5 nia laran, depois ha’u nia oan feto mak halo ami na'in rua dame malu, no agora daudauk ne’e ami hela hamutuk hanesan feen ho lae”, dehan konfesa arguidu ba Tribunál, horisehik.

Iha fatin hanesan, lezada ES informa ba tribunál katak, iha momentu arguidu fila husi festa mai ne’e nia iha kondisaun lanu.

“Iha altura ne'ebá ami toba hela tanba sei nakukun hela, depois arguidu to’o uma bolu ha’u nia oan mane. Tanba ami la hadeer entaun arguidu tebe odamatan”, dehan lezada.

Iha momentu ne’e arguidu foti kadeira atu baku, maibé lezada satan ho lezada nia liman hela no la kona, arguidu kontinua foti kadeira seluk hodi baku dala ida iha lezada kabas no tilun hun.

Liu husi alegasaun, Ministériu Públiku husu ba Tribunál atu aplika pena prizaun tinan ida suspende ba tinan 2, tanba arguidu komete krime violénsia doméstika hasuru nia-feen.

Entretantu, husi defeza husi arguidu husu ba Tribunál atu absolve, tanba arguidu arrepende nia-sala no oras ne’e daudaun sira na'in rua hela hamutuk ho uma ida.

Nune’e, Tribunál rona deklarasaun husi parte rua, Tribunál adia fali julgamentu ne’e ba loron 2 fulan-Maiu tinan 2017, hodi rona desizaun finál.

Iha audiénsia julgamentu prezide husi Juis singulár Francisca Cabral, Ministériu Públiku reprezenta husi Prokuradór Ivonia Guterres, arguidu hetan asisténsia legál husi defensór Públiku João Carvalho.  

Read 745 times
Rate this item
(0 votes)

About Author