Hafoin kaer, Polisia Tranzitu prende viaturas ne’ebé sira uza no bolu sira-nia inan-aman hodi presta deklarasaun no selu multa.

Segundo Komandante PNTL Munisipiu Dili, Superintendente Asistende Euclides Belo dehan, proibidu tebes ba labarik minoridade sira uza motor ho kareta iha estrada públiku.

Nia dehan, lei so fó dalan ba ema ho idade 17 ba leten no iha karta kondusaun mak bele lori viaturas iha fatin públiku.

“Bainhira ami halo operasaun mak kaer kona labarik sira lori viaturas iha dalan públiku, ami (sei) kaer labarik ne’e no bolu inan-aman sira halo deklarasaun no selu multa,” dehan Euclides ba Jornalista sira iha Komandu PNTL Munisipiu Dili, Sesta (31/3).

Nia hatete, lei la autoriza atu detein labarik sira iha sela, tan ne’e bainhira kaer Polisia sei prende de’it evidesia sira ne’e no halo infrasaun hasoru hodi selu multa.

“Kriteria sira ne’e mensiona ona iha lei. Polisia liu husi seksaun tranzitu iha artigu balun sublina ‘labarik sira ne’ebé viaturas tenke ho idade 17 ba leten no tenke iha karta kondusaun’,” katak nia.

Aleinde ne’e, nia dehan Komandu PNTL husu ba Ofisial Polisia Suku no Polisia Tranzitu atu fahe informasaun ba komunidade no estudante sira atu sira bele iha konsensia ba lei ne’ebé vigor.