Iha Sabadu (8/4) madrugada, PM konsege hapara atividade illegal ne’e tanba hetan informasaun husi komunidade sira.
Bainhira atividade ne’e la’o namanas hela, membru PM konsege tama hodi hapara no konsege kaer suspeitu na’in tolu ho evidensia balun.
Sasan ne’ebé PM konsege prende mak minarai litru 5.000, gazolina litru 200, tua jeneral kaisa 170, foos saka 50 no aikameli (seidauk identifika tonelada hira).
Komandante Unidade Polisia Militar (PM) Maijor Abel da Costa Xavier ‘Niki’ dehan, ho informasaun husi komunidade sira, PM konsege deteta duni area transaksaun illegal ne’e no halo kapturasaun.
Komandante Niki dehan, autór na’in tolu (3) ne’ebé PM kaptura oras ne’e sei detein iha Batugade hodi kontinua prosesu investigasaun.
Nia informa, nia parte mós prende kamioneta rua ne’ebé tula sasan sira ne’e. Kamioneta ida ho xapa matrikula 56.030 no ida seluk la identifika tanba xapa matrikula sobu tiha.
Hafoin prende, Niki dehan, nia parte entrega ona evidensia ne’ebé sira prende ba parte Alfandega iha Batugade.
“Maske sasan evidensia sira tau iha armajen Alfandega maibé sei iha kontrola Polisia Militar, tan seidauk iha seremonia autór de entrega,” nia hatete.
