Tuir akuzasaun husi Ministériu Públiku ne’ebé Tribunál lee sai katak, iha tinan 2012 Marciana muda ba hela iha Bekora, tanba lezada  nia inan-aman la aseita Marciana namora ho arguidu Julino.

Maske moris ketak ona, maibé Julino kontinua hasoru-malu ho Marciana, nune’e iha 20 Outubru 2012 tuku 12:00, arguidu ho lezada hasoru malu iha Largo-Lesidere. Sira sa’e taxi ba han no pasiar iha Tasi-Tolu.

Molok to’o Tasi-Tolu, MP informa, arguidu sei liu husi nia uma, iha Pantai Kelapa, hodi foti  tudik iha dapur no sikat iha nia faru laran la ho koñesimentu vitima.

Hafoin to’o iha Tasi-tolu no haan, arguidu lori vitima ba tur no ko’alia halimar iha tasi ibun, besik Karantina, durante oras ida nia laran. Arguidu la konsege halo asaun ruma, tanba ema barak, nune’e iha tuku 18:00, arguidu ho vitima fila ba uma ho taxi no tun iha arguidu nia uma.

Bainhira la’o tuir dalan atu ba uma, arguidu hahú hala’o nia asaun. Nia hasai tudik ne’ebé nia sikat faru laran hodi sona ba lezada nia kalilin okos, arguidu sona tan vitima nia kabun no kakorok okos.

Hafoin halo nia asaun ne’e no haree vitima nia is kotu, arguidu hakat ba besik ai hun ida ne’ebé la dok husi fatin vitima monu ba, hodi latan.

MP deklara katak, hare ba tudik no zona atinjida ba vitima nia isin, arguidu ho hanoin duni atu hakotu lezada nia vida.

“Arguidu nia hahalok ne’e ho forma konsiente, livre no deliberada no arguidu mós hatene nia hahalok ne’e proibidu no punida iha lei,” deklara MP iha TDD, Kinta (09/03).

Husi faktus sira ne’e, MP akuza arguidu komete krime autór material ho forma konsumadu, no krime omisidiu agravadu, ne’ebé hakerek iha artigu 139 kodigu penal Timor-Leste.

Hatan ba akuzasaun ne’e, arguidu Julino deklara katak faktus hirak ne’e loos hotu.

Arguidu dehan, nia ho lezada hela hamutuk ona durante tinan ida, maibé tanba lezada nia familia lakohi ikus mai lezada muda ba hela iha Bekora.

“Husi parte lezada nian  inan-aman lakohi ha’u atu moris hamutuk ho lezada,” dehan arguidu ba Tribunál.

Arguidu dehan, nia gosta loos no hakarak atu moris hamutuk ho lezada, maibé problema mak lezada nia familia la aseita.

Arguidu dehan, nia mós tenta oho an liu husi hemu baigon kahur ho bee no racun tikus atu bele mate dala ida de’it ho vitima, maibé nia la konsege mate.

Hafoin rona deklarasaun ne’e, tribunál submete kedas ba alegasaun final. Iha alegasaun final MP entrega ba Tribunal no defeza husu ba tribunal atu aplika pena ne’ebé mak Kaman ba arguidu.

Tribunál deside adia julgamentu ba 23 Marsu 2017 tuku 15:00 lokraik.

Audensia julgamentu ne’e prezide husi juiz kolektivu, Ministériu Públiku reprezenta husi Prokuradór Osorio de Deus no Remizia de Fatima, no arguidu hetan asistensia legal husi Defensór Públiku João de Carvalho.