Kuarta, 24 Outubru 2018 | Login
Misa iha loron natal Misa iha loron natal

Natál La'ós Tempu Promove Hatais Featured

DILI: Misa Santu Natál hanesan kultura ba sarani kristaun tomak iha mundu, inklui iha Timor Leste. Sarani hotu festeja loron moris Jesus nian, maibé la signifika iha loron ne’e ema hotu atu lori nia hatais foun ba promove iha Igreja.

Padre Parókia São José Ai-Mutin, Manuel Lelo Talok hatete, misa Natál kalan atu ema hotu haksolok hodi simu kosok-oan Jesus, tanba kalan ne’e sarani hotu iha mundu rai klaran hotu festeja.

“Iha Bíblia haklaken dehan Natál lori pás no domin ba ema hotu. La’ós Natál ema lori promosaun ho hatais oioin ba hatudu iha Uma Kreda”, dehan nia, iha omilia bainhira dirije Santa Misa Natál iha iha Parókia São José Ai-Mutin, Domingu (24/12).

Bibi atan ne’e esplika, iha Bíblia dehan misa kalan Natál iha buat importante maka Jesus mai halibur povu sira no fó hanoin Na’i Jesus mai atu lori pás ba nia ema sira.

Tanba, Natál ne’e lori dame no pás ba ema hotu. Tanba ne’e, ba ema ne’ebé laiha dame nia sei la hetan naroman.

“Ita nia moris mak nune’e de'it, sé ita nia moris iha ódiu malu, funu, problema no laiha dame no la unidade, entaun Natál ida ne’e mai baileet de’it”, tenik nia.

Ho nune’e, festa Natál la'ós atu halo ema lori nia roupa mai promove ka halo orna tun-sa'e. Bíblia só dehan de’it sarani halo de’it mak prezépiu no iha prezépiu laran rai de’it mak kosok-oan, Maria, José no anju sira.

Nune’e, iha selebrasaun misa liturjia ba loron 25 Natál dadeer nian iha ne’ebá hatete, tama ba Natál sarani sira tuur hodi lori hein mensajen husi Na’i Jesus, bainhira mensajen tama lori lia ksolok sarani sira simu ho kontente, maibé mensajen mai triste sarani sira simu ho ta'uk.

Tanba ne’e, Natál no Tinan Foun ne’e husu ba sarani sira atu haka'as-aan, badinas reza no ba misa, husik baruk-teen sira ne’e tinan tuan lori ba tiha.

“Ita ema sarani mak sai hanesan ajente notísia di'ak ba maun-alin sira. Tanba ne’e, ita nia kualidade atu lori lia ksolok iha tempu Natál ba maun-alin sira”, dehan nia.

Tuir observasaun diáriu ne’e, Natál kalan iha Parókia São José Ai-Mutin, sarani sira partisipa misa másimu tebes no haree ba situasaun realidade hatudu katak, sarani barak partisipa misa iha li'ur. Labele hola parte tama too iha igreja laran tanba kondisaun fatin limitadu.

Read 427 times
Rate this item
(0 votes)