Mata-been Teofilo iha Palku Asia Para Games Featured

By INDEPENDENTE Outubru 15, 2018 6859
Teofilo Freitas (rua husi kuanan), sai atleta Timor Leste dahuluk ne’ebé hetan medalla osan-mean iha Asian Para Games 2018. FOTO: asianparagames2018.id Teofilo Freitas (rua husi kuanan), sai atleta Timor Leste dahuluk ne’ebé hetan medalla osan-mean iha Asian Para Games 2018. FOTO: asianparagames2018.id

NIA ibun nakdedar. Nia hateke sa’e ba bandeira nasionál ne’ebé sa’e aas ba daudauk. Nia matan la konsege tahan bee ne’ebé obriga atu sulin. Nia tanis ho orgullu bainhira ino nasionál Patria Patria halo nakdedar Estadiu Prinsipal Gelora Bung Karno, Jakarta, Indonezia.

Orgullu ne’ebé boot tebes ba potu Timor Leste tomak ho susesu ne’ebé atleta Timor-oan ida, Teofilo Freitas, hetan iha eventu Asian Para Games 2018. Atleta iha modalidade para atletiku ne’e konsege oferese medalla osan-mean dahuluk ba Timor Leste.

Sprinter Timor Leste, Teofilo, ne’ebé tuun iha númeru metru 400 T37, susesu hada’u medalla osan-mean iha eventu desportu ba atleta defisiensia boot liu iha Asia ne’e.

"Kontente tebes ha’u bele hetan medalla iha Asian Para Games tanba ami foin ba dahuluk hala’o jogu iha ne’e,” dehan Teofilo sita husi asianparagames2018.id.

Treinadora, Cesaltina da Silva, rekoñese Teofilo treinu ho tempu ne’ebé minimu tebes.

"Nia tempu treinu menus tebes, maibé sorte, nia ema ida ne’ebé dilijente no esforsu maka’as ba Timor Leste,” dehan Cesaltina.

Hafoin partisipa iha Asian Para Games, Teofilo sei konsentra ba treinamentu hodi bele partisipa iha ASEAN Para Games iha Filipina iha 2019 oin mai. (*/kompas)

Rate this item
(0 votes)

Independente Digital TV