Governu sei Selu Multa Ba ConocoPhillips Kada Tinan Tokon $7 Featured

By Jacinto Xavier Dezembru 14, 2018 6446
Taur Matan Ruak Taur Matan Ruak

DILI: Relasiona ho Lei Atividade Petrolíferu ne’ebé Prezidente Repúblika veta ona sei halakon Orsamentu Estadu. Bainhira Governu la selu asaun ne’e to’o iha fulan Marsu 2019, Estadu Timor iha devér tenke selu multa ba kompañia ConocoPhillips kada tinan ho osan tokon $7.

 

Desizaun polítika Xefe Estadu veta Lei Atividade Petrolíferu fó impaktu ba Orsamentu Estadu tanba sosa asaun ne’e asina ona, nune’e asuntu ne’e sai ona kompromisu atu governu halo pagamentu.

Kompromisu ne’ebé Governu Timor-Leste ho ConocoPhillips ne’e bainhira la halo pagamentu liu fulan Marsu ne’e hetan ona multa, sura kada loron no fulan no to’o tinan ida multa hamutuk tokon $7.

Prezidente Parlamentu Nasionál, Arão Nóe de Jesus hateten, kona-ba Lei Atividade Petrolíferu, Prezidente Repúblika hato’o ona karta ofisial mai Parlamentu Nasionál relasiona ho ninia pozisaun veta.

Karta ofisial Xefe Estadu nian, PN distribui ona ba lider bankada sira ne’e hanesan konvokatoriu ida atu sira hatene hodi foti desizaun bainhira mak atu ajenda hodi halo fali reapresiasaun ba dekretu lei ne’ebé veta ona ne’e.

Nia hateten, loos duni OJE kuandu tama ona mai iha ne’e labele halo fali atividade seluk, maibé liu husi karta ofisial ne’e atu informa situasaun ne’e ba deputadu sira atu hatene hodi foti desizaun ruma reapresiasaun ne’e.

Ita atu halo fali apresiasaun ba Lei Atividade ne’ebé PR veta ona ne’e normalmente sei konfirma ho votu 50+1”, dehan nia iha PN horisehik.

Nia hatutan, alende ne’e, asaun Shell nian mós sai ona kompromisu, tanba ne’e governu tenke halo pagamentu karik lae to’o 2020 Estadu mós sei multa tan.

Haree ba polítika sosa asaun ne’e sai hanesan ona kompromisu maibé lei ne’e rasik hetan veta, entaun dalan seluk mak governu sei tau osan liu husi OJE 2019 ne’e.

Governu Timor-Leste liu husi Xefe Negosiadór Prinsipál Fronteira Marítima asina ona akordu ho kompañia ConocoPhillips hodi sosa asaun hamutuk 30% ho osan hamutuk tokon $350. Nune’e, halo mós akordu ho kompañia Shell hodi sosa asaun 26,56% ho totál osan tokon $300.

Maski nune’e, polítika ne’e difisil atu realiza hafoin Prezidente Repúblika deside hodi veta Lei Atividade Petrolíferu, ne’ebé fó biban ba Estadu Timor-Leste atu bele iha asaun ba atividade petrolífera nian másimu 20% de’it.

Rate this item
(0 votes)

Independente Digital TV