AMP Promete Harii Industria Kafé iha Ermera Featured

By Artur da Luz Abril 17, 2018 1107
Xanana ho taur hananu musika ida iha kampanha ba loron dahuluk Xanana ho taur hananu musika ida iha kampanha ba loron dahuluk

ATSABE: Programa prioridade husi koligasaun Aliansa Mudansa ba Progesu (AMP) nian ba Munisipio Ermera hamutuk 20, maibe importante liu hakarak loke industria kafe iha munisipiu ne’e hodi bele halo esportasaun ba rai liur.

Prezidenti partidu koligasaun AMP, Kay Rala Xanana Gusmão hateten, programa AMP hakarak dezenvolve diak liu rai ne’e, bainhira PLP ho KHUNTO tama atu implementa hodi serve povu ho laran.

Nia hatutan, programa ne’ebé AMP atu implementa ne’e rekolla ona. Antes ne’e, Taur Matan Ruak asume kargu Prezidente Republika tama-sai suku rona prekupasaun povu sira kada munisipiu.  Ne’e duni, AMP atu implementa mak preokupasaun sira antes ne’e rekolla tinan lima liubá.

“Iha planu estratejiku ba to’o 2030 ita fó dalan ba buat sira ne’e hotu no ita la’o hamutuk no fiar malu ba hodi fiar aan la’o ba oin”, dehan Xanana iha komisiu kampaña, iha Atsabe-Ermera, Domingu (16/4).

Nia dehan, Ermera nuda’ar fatin potensial ba industia kafé tanba maioria povu agrikultura mesak moris ho kafé, bainhira AMP hetan vitoria promote ba komunidade munisipiu ne’e katak, planu ba futuru maka harii sentru industria kafé ne’ebé boot iha Ermera.

Xanana hatutan, AMP ba 2018-2023 planu ne’ebé atu implementa liliu ba munisipiu Ermera mak atu hametin governasaun liu husi hadia kapasidade rekursu umanu hodi eleva kualidade servisu publiku iha munisipiu.

Nune’e, promove kualidade jestaun finanseira no boa prátika administrsaun iha munisipiu, promove ambiente negósiu ne’ebé favóravel ba investimentu agro-indústria, rezolve asuntu rai tuir lei ho kultura.

AMP mós hakarak hadia infrastutura bazika, liuliu estrada liga ba suku ho aldeia, dada eletrisidade ba suku ho aldeia ne’ebé seidauk asesu, fornesementu bee moos no hadia saneamentu ne’ebé presiza.

Prioridade mós atu hadi’a estrada nasional liga husi Gleno ba Atsabe, Bobonaru, Hatolia Ermera Tuan no Fatubesi ba Loes, harii merkadu munisipal no terminal munisipal ne’ebé integradu, nune’e harii ospital referral ida iha Gleno.

Nune’e AMP nia Prioridade mós Atu harii eskola tekniku vokasional, estabelesementu ba sentru formasaun no empregu hodi prepara jovem ba Servisu, promove saude publican hodi prevene moras, hatún mortalidade inan ho oan ho moras kontajioza.

“Estrada, eletrisidade no bee moos sei hadia hodi suporta industria kafé”, dehan Xanana.

Nia amenta tan, ba dezenvolvimentu ekonomia mak promove ambiente negósiu ne’ebé favoravel ba investimentu iha agro-indústria sei rezolve problema kona-ba rai tuir lei ho kultura. Hasa’e produsaun kafé organika liu husi rezuvensiamentu ba plantasaun kafé no halo jestaun di’ak ba Kolleta kafé, estabelesementu sentru prosesamentu kafé iha iha zona produsaun.

Nune’e, enkoraja partisipasaun setór privadu hodi hasa’e produsaun no asesu ba merkadu ba produtu agrikolas, liliu kafé ho ai-fuan,  ortikultura hanesan modo no mós aviáriu liliu manu tolun iha Rai-Laco.

Ikus liu AMP atu dezevolve turismu komunitária iha aréa Atsabe, liliu Mota Bandeira, Turizmu Relijiozu iha Letefoho no istoriku iha Ermera, Fatubessi, Mertutu ne’ebé subar fatin komandante Nino Conis Santana nian.

Tanba ne’e, ba munisipio Ermera Bainhira AMP hakarak prioridade liu ba agrikultor kafé sei moris diak, tanba folin diak no produsaun aumenta hodi esporta ba rai liur no balun distribui ba merkadu. 

Rate this item
(0 votes)

Independente Digital TV