Razaun Rekruta Asesor: Valoriza Profisional Timor-oan Featured

By Aquino Gomes Janeiru 10, 2020 995
Jose Luis Guterres Jose Luis Guterres

DILI: Prezidente Autoridade Rejiaun Administrativu Espesial Oekusse-Ambeno (RAEOA) José Luis Guterres fó ninia razaun ba rekrutamentu asesor ne’ebé nia halo.

Tuir J.Luis, nia rekruta asesor tanba hakarak atu valoriza profisional Timor-oan sira.

Aleinde valorize, J.Luis dehan, buat ne’ebé nia halo bazeia ba lei ne’ebé fó sai iha tempu eis Primeiru Ministru Rui Maria de Araujo.

“Lei ne’ebé sai iha tempu eis Primeiru Ministru Rui Maria Araujo, tanba lei di’ak tanba komesa atu valoriza ita-nia profisionais timorense. Ita labele hanoin bebeik katak ema sira mai husi rai li’ur ne’e di’ak liu ita, maibé ita-nia ema sira rai laran di’ak, hanesan mestradu, ita la valoriza ema sira ne’e,” dehan nia hafoin audensia ho komisaun C PN, Tersa (07/01).

Aleinde ne’e, nia dehan, rekrutamentu asesor ne’e mós tuir orsamentu ne’ebé iha.

“Ami labele rekruta ema barak liu purke, se lae, orsamentu laiha. Ha’u atu dehan ba imi katak kontratu (ba asesor) 15 hanesan ne’e tuir nesesidade, sira ne’e tinan ida de’it, aban-bainrua ita sei halo ajustamentu hodi haree ema ne’ebé kontinua no ema ne’ebé fó fatin ba ema seluk,” dehan nia.

Tuir nia, asesór la’os komplikadu barak dezde ema ne’e iha kompetensia  profisional no serbisu.

Nia hatutan, asesór mós atu fó apoiu ba iha sekretariu rejional hanesan  iha Oekusse.

“Timor-oan hotu hanesan maun no alin, tan ne’e Timor Leste tenke valoriza ema sira ne’ebé durante ne’e esforsu estuda iha universidade ne’ebé di’ak.”

Rate this item
(0 votes)

Independente Digital TV