Segunda, 14 Outubru 2019 | Login
Embaixadór na’in tolu hodi hala’o Estadu Timor-Leste nian iha Brazíl, Estadus Unidus Amérika (EUA) no Nova Zelándia. Foto Gabinete Presidente Republika  Embaixadór na’in tolu hodi hala’o Estadu Timor-Leste nian iha Brazíl, Estadus Unidus Amérika (EUA) no Nova Zelándia. Foto Gabinete Presidente Republika

PR Fó Pose Ba Embaixadór Na’in Tolu Featured

DILI:Prezidente Repúblika, Francisco Guterres Lú olo, fó pose ba embaixadór na’in tolu hodi hala’o Estadu Timor-Leste nian iha Brazíl, Estadus Unidus Amérika (EUA) no Nova Zelándia.

Prezidente no Governu nomeia sira na’in tolu ne’e tanba fiar katak sira sei haforsa liután relasaun entre Timor Leste ho nasaun tolu ne’e.

“Prezidente Repúblika fiar katak embaixadór sira ne’ebé foin simu pose iha kapasidade. Fiar katak sira bele hasa’e no loke liután nivel no ámbitu kooperasaun entre ita-nia Estadus” dehan PR, iha diskursu hafoin fó posse ba embaxador na’in tolu, iha Palacio Presidensiál, Aitarak Laran, Tersa (13/8).

Embaixadór Olímpio Branco maka sei ba hala’o nia misaun nu’udar embaixadór iha Repúblika Federativa Brazíl.

Olímpio Branco nia iha karreira naruk ona. Kaer ona knaar nu’udar Sekretáriu Jerál Negósiu Estranjeiru no Kooperasaun no hahú kedas servisu ba Ministériu Negósiu Estranjeiru, bainhira instituisaun ida ne’e harii, molok restaura formalmente Independénsia.

Embaixadór Olímpio Branco mós antes ne’e hala’ o ona knaar nu’udar Embaixadór Timor-Leste ba Repúblika Populár Xina no Repúblika Kuba. Konfia iha nia kompeténsia no dedikasaun no dezeja susesu ba embaixadór ne’e.

Embaixadór Isílio Coelho maka sai nu’udar Embaixadór ba Estadus Unidus Amérika (EUA). Antes ne’e, nu’udar Sekretáriu Jerál MNEK nian no Embaixadór ba Japaun.

Lisualdo Gaspar nu’udar Embaixadór ba Nova Zelándia, nu’udar kuadru ida iha ministériu diplomata karreira nian, estadu ne’ebé komunidade internasionál mós rekoñese, iha 2006, Nova Zelándia mai mós tulun Timor-Leste.

Ikus liu, Xefe Estadu hateten, bainhira presiza PR sei fó apoiu tomak ba embaixadór sira, nafatin iha PR nia konfiansa.

Iha fatin hanesan, Sekretáriu Jerál MNEK, Antonito de Araújo mós informa, depois semana rua mai tan hafoin prosesu halo hotu ona, imediatamente sei ba ona idak-idak nia fatin hodi hala’o sira nia servisu.

Embaixadór na’in tolu ne’e la'ós ema foun iha área ne’e, iha esperiénsia barak ona ne’ebé konsege liu no fatin atu haknaar an ne’e maka fatin foun ba sira.

Iha biban ne’e, Embaixadór Timor Leste ba Brazíl, Olímpio Branco mós hateten, dala tolu ona asume kargu nu’udar embaixadór. Buat hotu ne’ebé governu define estratéjia governasaun planu nasionál dezenvolvimentu sei kaer hanesan guia atu halo kooperasaun ba fatin tolu ne’ebé ohin simu pose sei hala’o.

“Ha’u nia misaun ba Brazíl sei buka hametin tan relasaun ba área edukasaun ne’ebé hala’o hela ona no área sira seluk ne’ebé Brazíl apoiu mai TL hanesan área judisiáriu, lori empreza privada husi Brazíl mai atu investe sira nia osan rasik hodi halo dezenvolvimentu”.

Lisualdo Gaspar mós hateten, ho umildade ohin simu pose husi Xefe Estadu hanesan funsionáriu karreira ho onra priviléjiu ida `hodi reprezentante estadu nian iha Nova Zelándia.

“Ita iha ligasaun ne’ebé di'ak tebes ho Nova Zelándia, povu Nova Zelándia apoiu tebes iha durante ita nia luta hanesan aliserse ida fundasaun ne’ebé atu kontinua relasaun ne’ebé di'ak iha setór seguransa ninia. Nu’udar embaixadór foun mantein nafatin relasaun ne’ebé di'ak”, tenik nia.

Isílio Coelho nu’udar Embaixadór ba EUA hateten, EUA nu’udar maiór parseiru dezenvolvimentu, tanba ne’e iha relasaun di'ak tebes, iha mós diálogu anuál sempre halo tinan tanba TL hala’o sira nia programa barak.

Haree ba bilaterál entre TL ho EUA intensifika liután presiza promove liu tan nivel sosiál no kulturál, iha posibilidade promove mós iha área turizmu. Rekapitula de'it relasaun polítika metin tebetebes.  

Read 550 times
Rate this item
(0 votes)