Molok ne’e, Xefe Gabinete Eskola Baziku Sentral (EBS) Manleuana, Dili, Ezequiel Santos Marques informa, foos rai saka 260 ne’ebé Sentru Nasional Lojistiku (SLN) distribui ba sira-nia eskola aat hotu ona.

“Foos rai ne’ebé EBS Manleuana simu husi SLN hamutuk 260 saka ne’e kinur hotu ona, maibé fornesidór sira kontinua tein fó ba estudante sira hodi merenda,” informa nia iha nia serbisu fatin, Kuarta (13/11).

Hatan ba kestaun ne’e, Diretór Jeral Polítika Planeamentu Parseria MEJD, Antoninho Pires husu atu eskola sira ne’ebé simu foos aat tenke hato’o keixa ba MEJD.

“MEJD husu ba eskola sira atu hato’o keixa ba Ministériu Edukasaun kuandu simu foos aat hodi bele hato’o ba Sentru Lojistika Nasional (SLN) hodi distribui fali foos di’ak,” informa nia iha Salaun Luz Clarita, Formoza, Kinta (14/11).

Durante ne’e, nia hatutan, parte Inspesaun Jeral seidauk aprezenta kazu foos aat ba MEJD, no seidauk iha eskola ida mak hato’o keixa ba MEJD relasiona ho problema refere.

Maske nune’e, nia hatutan, MEJD sei buka hodi identifika problema ne’e atu nune’e bele buka solusaun.

“Ministériu Edukasaun drop tiha ona foos ba eskola sira kada trimestral maibé seidauk hetan informasaun katak foos sira ne’ebé drop ba eskola sira ne’e aat hotu, sira nonook, kontinua fó nafatin ba estudante sira konsumu, tenke hato’o keixa hodi bele SLN fó fali foos di’ak,” nia husu.

Diretór ne’e informa tan, atu rezolve preokupasaun ba foos aat ne’e, MEJD propoin ona iha OJE 2020 atu hasa’e osan ba estudante sira ne’ebé molok ne’e sentavus $0.25 kada loron ba sentavus $0.50 kada loron.

“Iha proposta ba OJE 2020 nian MEJD nia proposta hakarak hasa’e labarik sira-nia direitu ba loron ida merenda $0.50 sentavus atu labele distribui ona foos ba eskola sira,” deklara nia.