May Day: Parabéns husi PR Lu Olo no Promesa Hasa’e Salariu husi SEFOPE Featured

By Cristina Ximenes Maiu 02, 2019 1753
PR Lu Olo PR Lu Olo

DILI: Iha loron trabaladór internasionál ne’ebé baibain hanaran “May Day” ne’ebé monu iha loron 1 Maiu, Prezidente Repúblika Francisco Guterres Lu Olo fó parabéns ba trabaladór hotu-hotu iha mundu. Enkuantu mosu promesa husi Sekretariu Estadu Formasaun Profesional no Empregu (SEFOPE) atu hasa’e salariu minimu ba trabaladór iha Timor Leste.

PR Lu Olo liu husi ninia mensajen iha loron trabaladór fó parabéns ba trabaladór sira iha Timor Leste no mundu tomak ne’ebé komemora loron importante ba trabaladór sira.

Iha oportunidade ne’e, PR Lu Olo konta istoria oinsa loron mundial trabaladór ne’e mosu.

PR Lu Olo dehan, Loron 1 Maiu mosu nu'udar data istóriku ida ba traballadór sira iha Chicago America, iha tinan 130 resin liu ba traballadór sira halo manifestasaun dahuluk hodi ezije kondisaun serbisu di'ak liu inklui hatun tempu serbisu husi oras 13 ba oras ualu kada loron.

Nune'e liu tiha tinan tolu iha Paris, França organizasaun internasionál hanaran internasionál sosialista, deside foti loron 1 Maiu nu'udar loron traballadór sira nian.

Bainhira loron ida ne'e sai hanesan loron ba traballadór nian, iha tihan 2005 Timor Leste asosia ofisialmente ho rai seluk iha loron 1 Maiu atu fó hanoin no valoriza traballadór hotu-hotu iha mundu tomak.

"Konstituisaun Timor Leste valoriza serbisu ne'ebé de'it mak ita halo, ho serbisu mak ita valoriza ita nia aan, nu'udar ema ho kapasidade no talentu, atu prodúz rikusoi ba ita rasik. Nune'e serbisu dignifika ita ema, nu'udar ema ne'ebé moris ho dignidade," dehan PR Lú Olo liu husi konferensia imprensa iha Palásiu Prezidensial Bairu-Pite.

Nune'e, tuir PR Lu Olo loron 1 Maiu sai nu’udar loron jornada ida atu hametin paz, solidariedade no amizade entre traballadór sira iha Timor Leste no traballadór iha mundu.

Prezidente mós apela ba seitór públiku no privadu sira atu hametin relasaun ho traballadór sira hodi garante traballadór sira-nia direitu no kondisaun empregu di'ak tuir lei haruka.

Rate this item
(0 votes)

Independente Digital TV