Lider Partidu FRETILIN-PD-AMP Kontaktu Malu Hela Featured

By Jacinto Xavier Maiu 28, 2018 3280
Xanana ho Assanami Xanana ho Assanami

DILI: Durante tempu kampaíña eleisaun antesipada mosu konflitu polítiku entre lider partidu sira, maibé tensaun ne’e komesa tuun ona.

Agora lider sira husi partidu FRETILIN, Partidu Demokrátiku (PD) no koligasaun Aliansa Mudansa ba Progresu (AMP) hahú kontakta malu.

Lider sira komesa ona hakbesik malu ona hodi ko’alia kona-ba prosesu formasaun governu ne’ebé sei akontese iha tempu badak nia laran.

Presidente PD, Mariano ‘Assanami’ Sabino hatete, eleisaun remata ona rezultadu hatudu katak AMP mak hetan vitória hodi forma VIII governu nian.

Iha períodu hira ba kotuk rezultadu eleisaun laiha partidu ida mak hetan maioria absoluta, entaun atu ba forma governu sempre iha kontaktu husi partidu vensedor hodi forma koligasaun ba ukun nian.

Maibé, agora ne’e AMP hetan maioria entaun sira la presiza kontaktu ho partidu seluk hodi halo koligasaun ba forma governu.

“Kontaktu formál mak laiha, maibé hanesan lider partidu ami nia kontaktu husi individu ba individu kontinua la’o nafatin”, dehan nian, iha salaun Esperansa, Delta, Sábadu (26/5).

Sira ne’ebé agora iha CNRT uluk hamutuk hafoin fahe malu, balun ba partidu seluk.Ba partidu FRETILIN, ukun hamutuk iha VII governu.Tanba ne’e, sempre kontaktu malu hodi koalia futuru povu no nasaun ne’e nian.

Ba formasaun VIII governu ne’e AMP atu ukun mesak ka nakloke aan hodi envolve mós ema husi partidu seluk, ne’e sei la kolia tama to’o iha ne'ebá tanba ne’e desizaun sira nian.

Maibé, hanesan jerasaun kontinuador sempre firme iha fatin ne’ebé de’it hodi serve la presiza tama governu, tanba PD nia prinsípiu mak hakarak serve Estadu.

Tanba ne’e, PD nia postura polítika iha parlamentu nasionál sei sai hanesan opozisaun ne’ebé konstrutivu, edukativu no dinámika, hodi halo diskusaun povu nia-interese ne’ebé uluk partidu sira promete ba povu iha tempu kampaña eleitorál.

Ne’e duni, Assanami apela ba kuadru partidu sira ne’ebé asume kargu diretór, xefe departamentu iha instituisaun governu, husu atu kontinua servisu ho laran ho neon hodi serve povu no nasaun ne’e tuir prinsípiu partidu nian.

Hanesan jerasaun kontinuador sei hametin nafatin prinsípiu fó-aan tomak ba serve hodi hametin Estadu ne’e ho ideolojia, nasionalista, demokrátiku, relijius ka fiar nian.

Partidu Demokrátiku PD kompromete hanesan jerasaun kontinuador sei kontra atu polítiku fo’er iha Parlamentu Nasionál, ne’ebé la benefisia povu no la tuir prinsípiu demokrátiku nian.

Xanana-TMR Naimori Mak Deside Kargu PM

Lideransa masimu AMP, Kay Rala Xanana Gusmão, Taur Matan Ruak no José dos Santos Bukar ‘Naimori’ mak sei deside kargu Primeiru Ministru atu lidera VIII.

Prezidente Komisaun Diretiva Nasionál AMP, Fidelis Magalhães hateten, to’o oras ne’e lider másimu AMP kontinua diskute namanas lista sombra VIII Governu konstitusionál.

“Lideransa husi partidu tolu nian mak sei haree no estuda hela”, dehan nia, iha Media Centre AMP, Bairru Grilos, Sábadu (26/5).

Kona-ba postura Governu ne’ebé ki’ik ka boot, Fidelis dehan, depende ba ezijénsia povu Timor-Leste.AMP sei foti desizaun ho objetivu oinsá hataan preokupasaun povu nian.

AMP mós preparadu ona hodi responde ezijénsia povu Timor-Leste liu husi programa nasionál, manuál polítika ho programa munisípiu, nune’e dezenvolve povu tuir nesesidade ne’ebé importante.

 

Rate this item
(0 votes)

Independente Digital TV