Domingu, 17 Novembru 2019 | Login
Jornalista Timoroan halo marsa iha loron liberdade imprensa mundial Jornalista Timoroan halo marsa iha loron liberdade imprensa mundial

Liberdade Imprensa TL Di’ak Liu Iha Sudeste Aziátiku Featured

DILI:  Tuir indise liberdade imprensa mundial liu husi Reportajen Seim Fronteiras hatudu katak, kontestu liberdade imprensa Timor-Leste iha Sudeste Aziátiku tinan ne’e, di’ak liu kompara ho tinan kotuk.

Bazeia ba dadus husi Reportajen Seim Fronteiras katak liberdade imprensa iha TL okupa pozisaun 96 iha tinan kotuk (2018) no tinan ne'e sa'e ba 86.

Tanba ne'e Tuir Presidente Konsellu Imprensa, Virgílio Guterres katak, prestasaun ne’e nu'udar progresu boot no di'ak tebes kompara ho tinan kotuk.

“daudaun ne'e ita hala'o liberdade imprensa tuir duni  saida mak  iha ita nian rain. Ita halo duni servisu ho kualidade   hodi garantia informasaun ba públiku”.

Prezidente KI hato’o lia hirak ne’e, hafoin sai oradór iha selebrasaun loron mundiál liberdade imprensa ho tema: ‘‘promove no valoriza liberdade imprensa’’ iha   Kampus UNTL Kaikoli, Kinta (2/5).

Virgílio hatutan, maski liberdade imprensa TL sei hasoru dezafiu oin-oin maibé, ida ne'e la problema no importante liu mak garantia nafatin kualidade informasaun, nune'e bele hataan duni ba ezijénsia públiku.

Tuir dadus husi KI hatudu katak, prestasaun   liberdade imprensa Timor-Leste sa'e, tanba TL hadi'a aan, kompara ho rai seluk.

Hanesan, Filipina nu'udar nasaun ida iha sudeste aziátiku ne’ebé uluk okupa primeiru lugar, maibé hafoin Durtete ukun, prestasaun liberdade imprensa monu, tanba jornalista sira mate.

Alende ne’e, iha Tailándia, uluk prestasaun liberdade imprensa di'ak tebes, maibé hafoin tinan rua to’o tolu iha rejime junta militár hafraku prestasaun   liberdade     imprensa komesa tun. Nune'e mós iha Myanmar, Kambodia no Vietname.

Tanba ne’e, lider másimu KI ne'e, husu órgaun komunikasaun sosiál sira ne'ebé eziste iha TL, atu hasa'e kualidade jornalista liu-husi kapasitasaun, atu bele eleva koñesimentu iha futuru, bele mantein prestasaun liberdade imprensa ne'ebé iha.

Iha fatin hanesan Prezidente RTTL.EP, Francisco da Silva hateten, maski liberdade imprensa iha TL sei hasoru dezafiu, maibé liberdade imprensa TL hamriik nafatin ho firme hodi hakat ba oin.

Nia husu ba média na’in sira tenke kapasita jornalista nune'e bele garantia profisionalizmu hodi oferese informasaun ne'ebé di'ak liu iha futuru.

Alende ne’e, dosente UNTL Departamentu Komunikasaun Sosiál Marcelino Magno orgullu tanba Timor Leste kontinua promove ninia liberdade imprensa, maski sei enfrenta dezafiu oioin.

Read 655 times
Rate this item
(0 votes)