Sexta, 18 Outubru 2019 | Login
HIV/SIDA. Foto Google HIV/SIDA. Foto Google

2019, Timor-oan 991 Pozitivu HIV/SIDA Featured

DILI: Tuir dadus husi Ministériu Saúde (MS) iha tinan 2019 Timor-oan hamutuk na’in 991 mak pozitivu hetan moras HIV/SIDA.

Diretór Programa Edukasaun Komisaun Nasional Kombate HIV/SIDA (KNKHS) Timor Leste Venancio Coelho informa, kada tinan númeru ema ho HIV/SIDA aumenta.

Iha tinan 2017, tuir dadus ne’ebé iha, númeru ema ho HIV/SIDA na’in 725, no iha tinan 2019, númeru ne’e sa’e ba 991, ka iha ema foun na’in 266 mak identifika hetan moras HIV/SIDA. Husi númeru ne’e, ema ho HIV/SIDA na’in 119 mak mate ona.

“Númeru HIV/SIDA agora daudaun komesa aumenta ba beibeik ona, tanba ne’e mak komisaun mós halo kampaña beibeik hodi bele reduz,” deklara Venancio iha Sentru Formasaun SOLS, Bekora, Kuarta (11/09).

Ba programa prevensaun, horsehik, KNKHS hala’o sensibilizasaun ba joven sira ne’ebé tuir formasaun iha SOLS.

“Materia sira ne’ebé mak ohin aprezenta iha kampaña ne’e kona-ba moras hada’et relasaun seksual ninian, transmisaun HIV/SIDA, oinsa mak sira hadook an husi transmisaun HIV/SIDA no mós oinsa halo prevensaun ba moras HIV/SIDA,” dehan nia.

Liu husi kampaña ne’e, KNKHS esplika ba joven sira oinsa atu bele prevene no hadook an husi transmisaun HIV/SIDA.

“Karik durante ne’e sira moris ona iha atividade sira ne’ebé lori sira ba risku transmisaun HIV/ SIDA nian, sira bele hakbesik an ba fasilidade saude sira ne’ebé iha hodi bele koko sira-nia raan hodi bele konfirma katak sira hetan HIV ou lae,” dehan Venancio.

Iha fatin hanesan, Diretora Nasional SOLS Timor Leste, Graciana Herculano apresia ho programa KNKHS tanba bele fahe informasaun ba juventude sira ne’ebé seidauk iha koñesimentu ba moras HIV/SIDA.

“Joven ne’ebé konsentra iha ne’e hamutuk na’in 750, mai husi munisipiu hotu-hotu,” dehan Diretora ne’e.

Tuir nia, durante ne’e joven barak mak ladun hatene kona-ba oinsa atu prevene moras HIV/SIDA, tan ne’e liu husi programa refere sira bele iha koñesimentu ne’ebé di’ak liu tan.

Read 1091 times
Rate this item
(0 votes)
MidAd1