Lere sei Fó Medida Ba Sarjentu ‘Dada Bibi’ Featured

By Cristina Ximenes Fevereiru 15, 2019 5720
Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur. FOTO: INDEPENDENTE Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur. FOTO: INDEPENDENTE

DILI: Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, sente moe tanba ninia membru ida ho postu diviza Segundu Sarjentu dada ema nia-bibi.

Maski nune’e, molok atu foti medida hasoru membru ne’e, nia sei orienta prosesu ne’e tenke la’o to’o hetan desizaun loloos.

“Ha’u nu’udar Komandante ha’u moe. Ema dehan ha’u nia sarjentu na’ok bibi. Ha’u dehan, agora prosesu tenke la’o. Na’ok tebes ka la’o besik ema nia-bibi ne’e mak deskonfia dehan nia na’ok bibi”, dehan Jenerál Lere, iha Palásiu Prezidensiál Bairru-Pité, horisehik.

Nia dehan, agora la’o besik ne’e mak na’ok bibi, entaun aban bainrua besik ema nia motór no karreta mós labele. La’o ema nia feen ruma mós labele. Hotu-hotu deskonfia mós ne’e mak evidénsia ona? Ne’e mak prosesu sei la’o.

Nia esplika, bainhira iha evidénsia katak membru ne’e halo duni aktu ne’e maka sei fó sansaun atu hakiak bibi iha Kuartél Jerál, nune’e labele ba dada tan ema ninia bibi. Sansaun hanesan mós sei hatún ba membru sira seluk bainhira dada ema ninia fahi ka ko'us ema ninia manu.

Antes ne’e, abitante sira iha Taibesse, baku membru F-FDTL ida ho inisiál JSBM tanba deskonfia pesoál ho diviza Segundu Sarjentu ne’e na'ok bibi iha mate-uma.

Kazu ne’e akontese iha Domingu maizumenus tuku 16.25, bainhira JSMB foin fila halimar jogu toto bola kore no dada bibi ida ne’ebé bobar hela iha ai besik mate-uma.

Ema hirak ne’ebé mai iha mate-uma haree aktu ne’e, nune’e sira la’o tuir pesoál ne’ebé uza roupa sivíl to’o nia hela fatin no hahú halo agresaun fíziku.

“Nia (pesoál F-FDTL) kore tiha bibi ne’e depois lori tiha. Ema sira iha mate uma ne’e haree mak duni tuir nia ba to’o Ai-Turi Laran”, informa Komandante Unidade Polisia Militár (PM), Majór Abel da Costa Xavier ‘Niki’.

Nia hatutan rezultadu husi prosesu investigasaun hasoru pesoál ho diviza Segundu Sarjentu ne’e sei aprezenta ba Xefe Estadu Majór F-FDTL, Majór Jenerál Lere Anan Timur.

Hafoin halo prosesu ba pesoál militár ne’e, sei bolu mós ema sira ne’ebé halo agresaun fíziku hasoru JSMB atu rona sira-nia deklarasaun.

Rate this item
(0 votes)

Independente Digital TV