Tribunal Distrital Dili (TDD) hala’o prosesu julgamentu ba arguidu Felner Benjamin Carmo Bucar Corte Real hanesan Komandante Peleton UEP, arguidu Damiao da Silva Correia atual Komandante PNTL Munisipiu Aileu, arguidu Afonso dos Santos Komandante Unidade Espesial Polisia (UEP), no Eduardo Pereira hanesan Xefe Sesaun Finansas UEP.
Arguidu na’in haat ne’e hetan akuzasaun fa’an cobihouse UEP no osan husi cobihouse ne’e sira hatama ba sira-nia bolsu.
Tuir akuzasaun husi Ministériu Públiku (MP) ne’ebé le’e sai katak, iha tinan 2013 arguidu na’in haat ne’e fa’an cobihouse ba Diretór Kompaña Cardel, Fernando Encarnacão.
Tuir akuzasaun, kazu ne’e akontese iha Agostus 2013 bainhira muda kampaun UIR iha Fatuhada ba kampaun foun Bairro-Pite Dili, tanba fatin refere sei uza ba F-FDTL. Sasan sira ne’ebé tau iha kampaun UIR tenke muda hotu ba kampaun UEP. Sasan sira ne’e hanesan jerador boot ho ki’ik, inklui cobihouse modelu uma iha 16, moldeu haris-fatin iha 2 no moldeu sintina iha 1.
Sasan hirak ne’e muda ona ba kampaun foun, maibé cobihouse arguidu na’in 4 deside fa’an tiha. Arguidu sira haruka nia membru Rogerio Amaral buka ema atu sosa. Nudar membru, Rogerio kumpri orden husi nia komandante sira hodi fó hatene ba arguidu Fernando nudar Diretór Kompania Cardel.
Hafoin haree, arguidu Fernando halo negosiasaun folin ho arguidu Afonso, Damiao no Felner, no arguidu Feranando oferese folin $4,000. Arguidu Afonso, Damiao, no Felner konkorda ho montante ne’e.
Iha loron 7 Agostu 2013 arguidu Fernando ba entrega osan $4.000 ba arguidu Eduardo no arguidu Fernando ho arguidu Eduardo asina kedas resibu no sertifika kedas husi arguidu Afonso, Damiao no Felner nudar Komandante, Segundu Komandante no Komandante Peletaun.
Simu tiha osan ne’e arguidu sira la transfere ba konta bankaria Estadu nian, maibé argguidu sira dezvia tiha osan ne’e ba sira-nia bolsu.
Rona akuzasaun ne’e, arguidu Felner dehan akuzasaun ne’e balun loos no balun la loos.
Nia dehan, fa’an cobihouse ne’e la’o ninia kompetensia no laiha desizaun koletiva atu entrega cobihouse ba kompania no laiha negosiaun antes hodi halo transferesia cobihouse ba kompañia.
Nia dehan, tanba hetan despasisu husi Segundu Komandate, nia halo tuir orden ka kumpri de’it.
“Tanba ne’e, momentu ne’e, ba tula cobihouse ha’u la hatene no osan ne’ebé mak apoiu husi kompaña-na’in, senhor Fernando mak fó osan $4 mill atu apoia admistrativa de’it. Osan $4 mill parte finansa mak rai, ne’e mak senor Eduardo Pereira nudar Xefe Seksaun Finansa UEP nian,” dehan arguidu ba Tribunál.
Tuir nia, osan ne’e la tau iha kofre estadu maibé tau iha finansa no osan ne’e la’os ba sira -nia privadu maibé uza hodi pinta karreta UEP.
“La loos, osan $4 mill ne’e la fahe, osan ne’e sentavus mós la tama ami-nia bolsu,” dehan nia.
Nia hatete, Komandande UEP, Afonso fó fila fali ona osan $4.000 ba kompaña no parte kompaña mós fó fila fali ona cobihouse ba UEP.
Arguidu rekoñese katak, hahalok ne’e la di’ak no kontra lei tanba sasan ne’e estadu nian no tuir loloos tama ba patrimonia estadu nian.
Arguidu seluk, Damiao da Silva Correia dehan, nudar Segundu Komandante UEP, iha momentu ne’eba hetan despaisu husi Komandate UEP atu bele akompaña sasan ne’ebé mak muda sai husi Hudi-laran ba Bairu-Pite.
Nia dehan, nia la koñese arguidu Fernando, nia so akompaña de’it atu tula sasan durante loron 2.
“Senhor Fernando fó osan $4 mill atu apoia serbisu finansa nian atu bele pinta karreta UEP nian, maizumenus karreta lima ne’ebé mak gasta osan mill e tal,” hateten nia.
Audensia julgamentu ne’e prezide husi Juiz Lolektivus Francisca Cabral, José Maria, Maria Solana Fernandes. Ministeriu Publiku reprezentante husi prokuradora Angelina Saldanha no arguidu sira hetan asistensia legal husi Defensór Públiku Sergio Quintas, Cancio Xavier no Olga Barreto.
