Sábadu, 16 Dezembru 2017 | Login
Tiago ho Fong Tiago ho Fong

JSMP Pesimista Governu TL sei Konsege Lori Fila Tiago ho Fong Featured

DILI: Tiago no Fong Fong Guerra ne’ebé halai ba Australia hafoin simu kondenasaun pekulatu husi Tribunal Distrital Dili (TDD) to’o ona iha Lisboa Portugal iha Sabadu (25/11) ne’ebé simu ho ksolok husi ninia familia lubuk ida.

Tuir informasuan ne’ebé jornal INDEPENDENTE sita husi públikasaun tvi24, familia sira ne’ebé simu Tiago ho nia feen lakohi atu fó komentariu ba media no Tiago rasik hatete nia laiha problema atu koalia ho media, maibé nia sei la halo intervista iha aeroportu.

Tuir tvi24, kazu Tiago ho nia feen halai hamosu tensaun diplomatiku entre Timor Leste ho Portugal, asuntu ne’e hamosu kritika husi lider politiku no sosiadade sivil, ne’ebé ezije investigasaun ba embaixada Portugal iha Dili.

Iha semana kotuk, Ministru Negosiu Estranjeiru Portuges, Augusto Santos Silva, garante katak embaixada iha Dili respeita lejislasaun Portuges bainhira atribui pasaporte ba Tiago ho nia feen.

Hafoin halai ba Australia, Augusto Santos Silva fó orden atu halo inkeritu orijente ba Inspesaun Jeral Diplomatiku no Konsular, ne’ebé ninia konkluzaun entrega ona iha Kinta kotuk.

Kazal Guerra renova sira-nia kartaun sidadania iha inisiu tinan ne’e, no foin lalais ne’e sira-nia pasaporte Portuges sai, ida ne’e provoka kritika husi media Timor Leste. Deklara tvi24 iha ninia públikasaun.

"Sidadaun portuges iha direitu ba dokumentu identifikasaun nu’udar sidadaun portuges, sees husi situasaun jurídika ne’ebé sira hasoru, dezde la viola lei ka regras balun. Iha kazu ne’e, laiha violasaun ruma, tuir ami-nia investigasaun, sira kumpri lejislasaun portugueza, tan ne’e, atribui passaporte, tuir lei", esplika Santos Silva.

Iha fulan Agostu 2017 juiz koletivu TDD kondena prizaun tinan 8 no multa $859.000 ba Tiago no Fong Fong Guerra tanba komete pekulatu, brankamentu kapital no falsifikasuan dokumentus, no tranferensia osan rihun $859 dólares, ne’ebé halo iha tinan 2011 bazeia ba pedidu husi konsultór norte-amerikanu, Bobby Boye.

La simu ho desizaun ne’e, Tiago ho Fong Fong Guerra hato’o rekursu ba Tribunal Rekursu (TR). Maibé, molok iha desizaun ruma husi TR, feen ho laen ne’e halai ona ba Australia.

JSMP Pesimista

Entretantu, Diretór Ezekutivu Programa Monitorizasaun Sistema Judisial (JSMP), Luis de Oliveira Sampaio pesimista governu Timor Leste sei konsege lori fila Tiago ho nia feen hodi mai kumpri pena ne’ebé TDD hamonu ona.

Tuir Luis Sampaio, defisil tebtebes katak prosesu atu lori fila arguidu Tiago ho Fong Fong Guerra mai Timor Leste todan tanba laiha akordu ekstradisaun.

Aleinde ne’e, kazu Tiago Guerra ho nia feen, Luis dehan, nudar kazu ba dala rua ema estranjeiru ne’ebé halai husi justisa Timor Leste.

Nia informa, iha tinan 2011, ema estranjeiru ida ne’ebé komete krime kontra umanidade hetan kondenasaun husi TDD pena prizaun tinan 8 fulan 6 maibé bainhira hato’o rekursu ba Tribunal Rekursu no prosesu ne’e la’o hela ema ne’e halai ba rai li’ur.

“Ema ne’e halai sai ba estrajeiru to’o agora governu la halo meius diplomatika atu lori fila,” dehan Diretór JSMP ne’e.

Tuir nia, kazu hanesan ne’e hatudu situasaun rua. Ida, ema estrajeiru sira laiha konfiansa ba sistema judisiariu Timor no ida seluk sira duvida ho kredibilidade no kapasidade sistema judisiariu atu halo julgamentu tuir lei. 

Read 147 times Last modified on Sexta, 01 Dezembru 2017 09:26
Rate this item
(0 votes)

About Author

  • MidAd1
  • Heineken Klaran
AdBottom1