Kuarta, 22 Novembru 2017 | Login
Merkadu iha Maubisse Merkadu iha Maubisse

Orsamentu Retifikativu La Pasa Posibilidade Mosu Krize Ekonomia Featured

DILI: Tensaun polítika entre partidu kaer ukun no opozisaun bele lori Estadu ne’e ba dezastre foun ida. To’o ohin loron seidauk hetan dalan loloos kona-ba ezisténsia governu nian. Ne’e duni, bele mosu krize ekonomia, bainhira governu la diskute orsamentu anuál to’o fin-du-anu ne’e.

Governu hanoin ona atu aprezenta Orsamentu Retifikativu (OR) ba Parlamentu Nasionál hodi bele sustenta nesesidade povu no estabilidade funsionamentu mákina Estadu nian, maibé partidu opozisaun hatudu ona sinál kontra.

Ne’e duni, Prezidente Bankada FRETILIN, Francisco Miranda Branco hateten, situasaun ne’e akontese tanba polítiku sira-nia arrogánsia no egotizmu ne'ebé hakarak defende de’it sira-nia prinsípiu no grupu, hodi tau fali interese Estadu no povu nian iha okos.

“Desizaun polítika ninia konsekuénsia barak tebes, tanba moris povu ian atu hetan resposta, maibé labele tanba Orsamentu Retifikativu la hetan aprovasaun husi Parlamentu Nasionál”, dehan nia, iha Uma Fukun PN, horisehik.

Iha fatin hanesan, Prezidente Bankada Partidu Demokrátiku (PD), Maria Teresa Gusmão hatete, VII Governu iha hanoin pozitivu atu serve povu no ne’e, maibé pelu-kontrariu AMP nafatin vota kontra vontade di'ak ne’e.

Ne’e duni, husu ba AMP tenke tane aas povu no rai ne’e nia hakarak, duke partidu no ema balu nia interese, tanba povu terus barak ona.

Tanba ne’e, husu ba fundadór nasaun sira tenke iha konxiénsia hodi haree ba povu nia terus, liuliu ba joven sira ne’ebé to’o ohin loron seidauk hetan oportunidade.

Fundadór sira presiza tuur hamutuk hodi deside ba saida mak di'ak, tenke fó liman hamutuk hodi ko'alia ba malu, atu nune’e molok sira taka matan husik hela istória di'ak jerasaun foun sira.

Iha fatin hanesan, Deputada Bankada CNRT, Brígida António Correia hatete, krize ekonomia sei la mosu bainhira komprende didi’ak ho situasaun polítika iha Timor.

Tanba ne’e, komprende didi’ak situasaun ne’e ba atividade parte polítiku sira halo bazeia ba Konstituisaun fó dalan ba opozisaun atu tau responsabilidade hodi asegura governasaun ne’e.

“Ita hotu hanoin hakarak nasaun ne’e estavel hodi la'o ba oin hodi kria nafatin esperansa husi investidór sira. Oinsá ulun boot sira ho ulun malirin bele rezolve problema ne’ebé agora mosu, liuliu iha aprezentasaun programa no Orsamentu Retifikativu”, dehan nia.

Tanba, konstituisaun hanesan dalan ne’ebé loos, nune'e sei laiha buat ida atu mosu iha ne’e. Agora mosu la’ós atu hadau podér, maibé tanba dalan ne’e ema hotu hakarak asegura kompetisaun ba rai ne’e.

Read 1003 times Last modified on Kuarta, 08 Novembru 2017 18:40
Rate this item
(0 votes)
  • MidAd1
  • Heineken Klaran
AdBottom1