Rekrutamentu Kadete PNTL Foun Adia Ba 2020 Featured

By Cristina Ximenes Outubru 26, 2018 7157

DILI: Xefe Governu, Taur Matan Ruak, orienta Komandante Jerál Polisia Nasionál Timor Leste (PNTL) kansela rekrutamentu ba kadete foun ne’ebé tuir planu sei realiza iha 2019.

Komandante Jerál PNTL, Komisáriu Júlio da Costa Hornay hateten, Primeiru Ministru, Taur Matan Ruak, orienta katak iha 2019 laiha rekrutamentu ba kadete foun tanba plafond Orsamentu Jerál Estadu (OJE) 2019 nian ultrapasa ona.

Instituisaun PNTL konsidera rekrutamentu ba kadete foun importante tebes hodi reforsa polisia efetivu sira iha terrenu.

“Bainhira Primeiru Ministru ko’alia hanesan ne’e (kansela) ami prontu simu,” dehan, Komisáriu Júlio, iha edifísiu Ministériu Finansas, Ai-Tarak Laran, horisehik.

Maski nune’e, iha tempu badak dirijente PNTL hamutuk ekipa tékniku sei hasoru Xefe Governu atu diskute asuntu ne’e.

Tuir nia, membru polisia efetivu seidauk sufisiente iha terrenu hodi asegura seguransa iha komunidade.

Nune’e, planu PNTL nian hakarak tinan 2019 tenke halo rekrutamentu ba kadete polisia foun sira hodi reforsa instituisaun Polisia liuliu Ofisial Polisia Suku (OPS) no Tránzitu ne’ebé sei menus rekursu.

Antes ne’e, Komandu PNTL relata katak, iha rekrutamentu kadete foun PNTL nian ho totál ema na’in 520 ho faze rua.

Rate this item
(0 votes)

Independente Digital TV