Joven Tenke Banati Tuir Saudozu L-4 Featured

By INDEPENDENTE Novembru 15, 2018 6201
Saudozu André da Costa Belo 'L4' Saudozu André da Costa Belo 'L4'

DILI: André da Costa Belo, ema ne’ebé iha papél importante ba luta libertasaun nasionál no mós setór edukasaun iha Timor-Leste. Tanba ne’e, foin-sa’e presiza atu banati tuir ain-fatin saudozu nian.

Ministru Ensinu Superiór Siénsia no Kultura (MESSK), Longuinhos dos Santos hateten, eis-sekretáriu Estadu Asuntu Veteranu ne’e sakrifika aan tomak ba nasaun. Ne’e duni, juventude sira tenke banati tuir saida maka saudozu halo ona durante ne’e.

“André Belo hanesan aman ida durante ne’e sakrifika aan tomak hodi dezenvolve UNDIL, tanba ne’e alin estudante UNDIL tomak presiza banati tuir saida mak ita-nia aman halo ba ita”, dehan nia, iha knaar fatin Vila-Verde, horisehik.

Entretantu, Ministru Reforma Lejizlativa Asuntu Parlamentár (MRLAP), Fidelis Magalhães dehan, Governu hato’o sentidu kondolénsias profunda ba família matebian André Belo ‘L-4’, ne’ebé ativa parte ba rezisténsia iha konstrusaun ba Estadu.

Nia dehan, Estadu Timor tenke lutu ba L-4 tanba nia dedikasaun mak ohin loron Timor hetan independénsia, ne’e duni onra boot ba matebian.

L-4 mós hola parte fundadór PLP, nune’e kuadru polítika partidu tomak hadomi eis-Sekretáriu Estadu Asuntu Veteranu ne’e no partidu rasik sente lakon tebes.

Antes ne’e, saudozu halo tratamentu dala rua iha Singapura bainhira sei asume pasta nu’udar Sekretáriu Estadu asuntu veteranu iha Mandatu VII Governu konstitusionál, maibé la konsege rekupera 100%.

Nune’e, saudozu L-4 hakotu iis 12 Novembru 2018 bainhira hetan ataka iha ninia rezidénsia Fatuhada Dili.

Membru Governu Hato’o Kondolénsias

Membru governu hato'o kondolénsias ba saudozu André Belo ‘L-4’, iha ninia rezidénsia Fatuhada-Dili.

Kuaze membru governu ativu no eis-membru governu, inklui instituisaun PNTL no F-FDTL habesik aan ba matebian nia hela fatin hodi fó omenajen ikus nian.

Rate this item
(1 Vote)

Independente Digital TV