Reprezentante Komunidade Suku Lau-Hata, Felisberta Moniz hateten, durante ne’e fó hatene ona ba autoridade lokál hanesan, Xefe | Aldeia no Xefe Suku sira para atu hato’o ba ministériu kompetente sira, maibé to’o agora sira seidauk responde ba ida ne’e.

“Ami fó hatene ona ba autoridade lokál sira, maibé to’o ohin loron sira seidauk responde ba ida ne’e,” esplika Felisberta, ba INDEPENDENTE,  iha Likisa, Tersa (21/03)

Felisberta informa, durante ne’e kuru de’it bee posu ne’ebé uluk sira kee ho liman. Tanba ne’e atu uza ba tein nono hodi hemu tenke lori masa ou jergen ba kuru iha ne’ebá. Tanba bee moos iha fatin seluk la iha ona. Ne’e duni labarik sira atu ba eskola ou ba servisu dala ruma harus de’it.

“Ema sira ne’ebé iha motór bele ba lalin, maibé ami sira ne’ebé la iha transporte tenke leba masa no kesi hamutuk mak tutur de’it lori mai uma,” dehan nia.

Iha fatin hanesan Komunidade,Edy dos Santos hateten, durante ne’e populasaun sira iha Lautaha ne’e susar duni ba bee moos, tanba ne’e husu ba parte kompetente atu hadi'a lalais bee ne’ebé aat ne’e. Tanba durante ne’e komunidade sira ba kuru bee posu de’it.

“Ami iha ne’e bainhira bee SAS la funsiona, ami hotu-hotu ba kuru mak bee posu de’it, tanba iha fatin seluk la iha ona,” informa Edy.

Edy hatutan, atu asesu ba bee posu ne’e tenke la’o kuaze kilu metru ida ho balun, maibé ema ne’ebé iha transporte bele uza ba lalin bee hodi nune’e uza ba loron rua ou tolu.