Xanana Gusmão hetan konvite husi Sekretáriu Jerál ONU, hodi partisipa enkontru ho nasaun postu konflitu sira iha mundu tomak.

Portavós AMP, Taur Matan Ruak hateten, ONU konvida Xanana hodi konvida mós nasaun sira ne’ebé hola parte postu konflitu. Tanba ne’e, iha seminariu ne’e sei deskute liu kona-bá  oinsá hametin estabilidade no pás iha nasaun postu konflitu sira.

Enkontru ne’e sei realiza durante loron haat (4) nia laran, tanba ne’e mak maun Xanana dezloka ba rai liur, iha Sábadu 21 Abril, nune’e fila hikas iha Sesta 27 Abril, nune’e durante loron hitu nia laran sei laiha komísiu públiku maibé mini kampaña.

Tanba ne’e, Prezidente AMP sei labele partisipa iha kampaña AMP nian iha munisípiu mini kampaña sira iha Munisípiu Baukau, Manatutu no Vikeke, ne’ebé portavós AMP, Taur Matan Ruak, ho Konselleru KHUNTO Naimori maka sei kobre to’o iha ne’ebá.

Nune’e, hafoin fila hikas husi rai li’ur, Xanana sei partisipa kampaña komísiu boot iha Munisípiu Baukau, Vikeke no Lautem, Oekusi, inklui munisípiu sira seluk ne’ebé AMP seidauk realiza ninia kampaña.