PN La Autoriza Viajen PR Ba Novaiorke Featured

By Jacinto Xavier Setembru 20, 2018 6789

DILI: Parlamentu Nasionál liu husi kinta lejizlatura la autoriza dezlokasaun Presidente Repúblika (PR), Francisco Guterres ‘Lú-Olo’, hodi partisipa iha  reuniaun Asembleia Jerál Nasaun Unidas-Novaiorke.

Tuir Konstituisaun bainhira Xefe Estadu viajen ba estranjeiru tenke iha deliberasaun husi PN hodi fó autorizasaun. Tan ne’e, liu husi sesaun plenária maioria deputadu sira vota kontra viajen PR Lú-Olo nian ho votu, kontra 33 no afavor 25, nune’e dezlokasaun ne’e kanseladu.

 Tuir planu, Xefe Estadu sei halo viajen naruk hahú iha loron 21 Setembru 2018 ba Austrália, depois partisipa konferénsia internasionál iha Bali-Indonézia, reuniaun Asembleia Jerál Nasaun Unidas-Novaiorke, vizita ofisial ba Vatikanu-Roma no mós konferénsia ida iha Áfrika.

Kanselamentu viajen Xefe  Estadu ne’e balada rua ona  husi Parlamentu Nasionál la autoriza dezlokasaun  PR Lú-Olo, hodi halo viajen ba nasaun amigu Portugál liu husi votasaun kontra 35 no afavor 29

Vise Presidente Bankada Partidu Demokrátiku (PD), Adriano Nascimento,  hatete xefe estadu nia viajen ba partisipa asembleia Jerál ONU importante tebes tanba atu hametin relasaun bilaterál entre nasaun membru ONU nian.

Nia lembra, Partidu Demokrátiku PD, Frente Mudansa no CNRT halo koligasaun hodi ukun iha IV lejizlatura iha momentu ne’ebá Prezidente Repúblika  Taur  Matan Ruak atu halo vizita estadu ba rai li'ur, maibé  Bankada Governu la aseita. Bankada PD foti risku hodi vota afavor ba dezlokasaun Xefe estadu nian.

 Tanba nia dehan, vizita estadu husi Presidente Repúblika nian ba iha nasaun seluk ne’e lori estadu nia naran hodi internasionaliza Timor.

Iha V lejizlatura ne’e, nia dehan Xefe Estadu hakarak atu ba vizita estadu hodi halo kooperasaun bilaterál ho nasaun seluk,  maibé deputadu sira husi bankada governasaun sira vota kontra.

“Ha’u preokupa Presidente Parlamentu Nasionál segundu homem iha RDTL maibé nia mós kontra viajen Xefe estadu ne’e tuir loloos la akontese, karik nia ta'uk vota abstensaun mós la buat ida,” dehan nia iha PN-Dili, horisehik.

Nia dehan, Presidente  PN hanesan lider órgaun Soberania daruak nian nia labele kontra fali lider órgaun soberania seluk ne’e  afeta ba konstrusaun estadu nian iha futuru.

Iha fatin hanesan, Presidente Bankada KHUNTO António Nobre, hatete viajen Presidente Repúblika nian ne’e importante tebes atu konsidera tanba reprezenta estadu ba iha estranjeiru hodi hametin kooperasaun ho nasaun seluk.

“Ami nia preokupasaun mak Orsamentu Jerál Estadu mós seidauk promulga no membru governu mós seidauk kompletu tanba ne’e presiza iha tempu badak nia laran bele rezolve hafoin bele haree fali ba buat seluk” dehan nia iha PN horisehik.

Tanba nia dehan, iha governasaun ne’e hakarak hametin estadu hodi garantia dezenvolvimentu, maibé labele garantia ezekusaun orsamentu tanba membru governu seidauk kompletu tanba ne’e presiza haree.

Alende ne’e, nia dehan PR rasik seidauk promulga  OJE 2018 ne’e atu foti osan husi ne’ebé mak hala’o viajen.

Entretantu,  Deputadu Bankada FRETILIN Joaquim dos Santos, hatete Presidente Parlamentu Nasionál tuir konstituisaun , se karik Presidente Repúblika laiha fatin nia mak sei asume responsabilidade hanesan Presidente Repúblika interinu,  maibé nia rasik vota kontra viajen Xefe estadu ne’e la loos tanba ne’e polítiku  nakonu ho odio vingansa.

Nia hatete, vizita estadu hanesan ne’e tuir loloos deputadu sira tenke konsidera hodi hasees tiha interese partidária, grupu ka individu hodi fó liman ba malu hodi haree ba interese nasaun nian.

Nia hatete, problema ema na'in sia ne’ebé seidauk simu pose ne’e tuir loloos Primeiru Ministru foti ona medida hodi halo substituisaun.

Deputadu ne’e dehan, ba sira na'in sia ne’e to’o agora halo ona saida ba nasaun ida ne’e  mak tenke mantein nafatin sira hodi prezudika vida ema maioria nian.

Molok ne’e,  Xefe Kaza Sivíl Prezidénsia Repúblika, Francisco Maria Vasconcelos hateten, desizaun Xefe Estadu atu bele halo viajen ba rai li'ur ka lae depende ba Parlamentu Nasionál.

Nia dehan, karik Prezidente Repúblika nia viajen ne’e maka Parlamentu Nasionál maka la aprova, entaun Xefe Estadu labele ba.

Francisco dehan, bainhira PN la aprova viajen Prezidente Repúblika nian ba estranjeiru iha ultima hora maka Estadu sei lakon osan saugati, tanba tenke selu fatin hirak ne’ebé booking ona iha rai li'ur atu komitiva Xefe Estadu nian ba hela.

Nia fó ezemplu, hanesan iha Portugál bainhira kansela tenke selu $50.000. Ne’e duni, desizaun hotu-hotu ne’ebé foti sei iha ninia kustu.

 

Rate this item
(0 votes)
Last modified on Kinta, 20 Setembru 2018 10:21

Independente Digital TV