Ofisialmente, Sabdu ohin iha Palacio Presidensiál, Aitarak Laran, Dili, lider partidu politiku sira iha Prezidente-da-Repúblika Francisco Guterres nia oin, deklara sira-nia kompromisu no promete atu hametin pás no estabilidade iha eleisaun lejislativa.
Prezidente-da-Repúblika foti inisiativa halibur lider sira iha partidu polítiku hotu ne’ebé konkore ba eleisaun lejislativa kontribui ba garante pás no estabilidade. Lider sira husi partidu polítiku hato’o ida-idak nia hanoin kona-ba saida mak sira hakarak relasiona ho eleisaun lejislativa ida ne’ebé sei la’o iha pás no estabilidade nia laran.
Ikus mai depois de ekontru durante oras 5 nia laran, partidu polítiku hamutuk 21 asina deklarasaun konjunta hodi kompromete katak partidu polítiku sira sei kontribui ba prosesu eleisaun ida ne’ebé sei la’o iha pás no estabilidade nia laran. Partidu polítiku sira sei respeita malu, hakribi violénsia, la uza money politic no la halo kampaña foer, kontra ataka pesoál ba ema nia orijin, rasa no orijin. Partidu polítiku sira mós kompromete atu simu desizaun ne’ebé povu determina eleisaun lejislativa.
Asina Deklarasaun Palásiu Prezidente Nicolau Lobato ho sasin Provedór Direitu Umanu Silverio Pinto Baptista no Maria Virna Soares husi CNE, lider partidu polítiku hotu ba kuda ai-oan iha resintu Palásiu Prezidénsia atu simboliza sira-nia kompromisu ba eleisaun ida ne’ebé sei hala’o iha ambiente ida ne’ebé la’o ho livre, transparente, justu, kredivel, laiha violénsia no mós hakmatek.
