Sábadu, 23 Outubru 2021 | Login
Lider AMP Lider AMP

Opozisaun Sadik Lori AMP Ba Tribunál Featured

DILI: Relasiona ho deklarasaun bloku koligasaun ne’ebé la rekoñese bloku Aliansa Maioria Parlamentár (AMP), ne’e duni ‘sadik’ no husu atu bele aprezenta ba tribunál hodi bele haree lejitimidade bloku ne’e nian tuir lei.

Prezidente Bankada FRETILIN, Francisco Miranda Branco, antes ne’e deklara katak, ezisténsia AMP ilegál tanba VII Governu estabelese ona hafoin sira buka malu hodi hari bloku..

“Sira haree AMP laiha ona legalidade foin hakfodak ba lee lei partidu polítiku nian hodi luflafu halo konferénsia”, dehan nia.

Hataan ba kestaun ne’e, Prezidente Bankada CNRT, Arão Noe de Jesus hateten, ema barak kritika ezisténsia AMP dehan ilegál, maibé ne’e la loos tanba bazeia ba Konstituisaun artigu 106 kona-ba formasaun governu.

Iha Ne’ebé fó dalan hodi halo koligasaun hodi harii governu no ida seluk mós fó dalan ba AMP atu moris.

Alende ne’e, partidu tolu ne'ebé hamutuk hodi harii AMP kumpre ona lei partidu polítiku artigu 19 hodi realiza konferénsia nasionál hodi hametin plata forma polítika ne'ebé partidu CNRT, PLP no KHUNTO inisia ona.

“Se mak iha duvida halo favór bele lori ba tribunál para husu konstitusionalidade, la'ós komentáriu de'it iha públiku dehan ne’e ilegál”, dehan Arão, iha Suku Manleuana, Sábadu (6/1).

Esforsu ne'ebé AMP halo, ema barak dehan atu hadau podér, maibé kuandu governu ida la kumpre ona nia devér hodi la mai aprezenta programa maka AMP sei kontinua halo mosaun sensura ba governu.

Fó oportunidade mós ba Prezidente Repúblika (PR) atu bele harii VIII Governu ka hakat ba Eleisaun Antesipada (EA), ne’e konforme desizaun polítika Xefe Estadu nian, tanba ne’e AMP kompromete sei hakru'uk no simu desizaun saida de'it.

AMP mós sei la interfere ba desizaun, tanba iha Konstituisaun hatete ona kona-ba separasaun podér. Tanba ne’e, husik kada órgaun ida-idak bele hala’o nia servisu.

Arão observa, AMP ne'ebé harii husi partidu tolu ne’e sólidu tebes difisil atu naksobu, tanba durante ne’e halo desizaun ruma mós koletivu.

Reprezentante portavós AMP, Tomás Cabral hateten, AMP iha forsa ezisténsia tanba Konstituisaun garantia. Tanba ne’e, atividade hasae bandeira tolu iha kada sede partidu nian ne’e hahú ona husi nivel nasionál to’o baze.

Objetivu maka atu haforsa plata forma polítika ne'ebé halo ona, tanba ne’e partidu tolu sei sai forsa ida hodi hakat hamutuk to’o 2022.

Tanba ne’e, alerta ba estrutura partidu tolu atu hahú konsolida militante sira iha baze hodi hari estrutura no halo reestruturasaun lideransa partidu nian iha baze, nune’e bele metin liután hodi hein desizaun Prezidente Repúblika.

Read 691 times
Rate this item
(0 votes)