Juramentu ne’ebé halo ne’e husu ba matebian rai-lulik no fatuk-luluk hodi haforsa militante AMP sira tenke vota ba AMP, nune’e eleisaun entisipada mai tenke ukun nasaun.
“Ramelau, Matebian ho Kablaki, ha’u jura ba Ó hodi tuir AMP ne’ebé mate ka moris hili numeru ualo (8)”, lia hirak ne’e maka sai nu’udar deklarasaun juramentu ne’ebé halo ba militante no simpatizante AMP, ne’ebé lidera husi Naimor.
Nia dehan, militate sira tenke hili AMP tanba hadomi Xanana Gusmão ho Taur Matan Ruak no laiha lider ida mak atu hanesan sira hodi hamutuk ho povu lori naroman.
Durante funu invazaun laran, inimigu sira sama no hanehan povu maibé la tauk, tanba saida mak ukun-aan tauk fali. Ne’e duni, povu Timor-Leste ho militante AMP sira labele tauk sé deit tanba ukun aan ona.
Naimori alerta ba matebian rai-lulik, fatuk-lulik sira tenke hadeer hodi lori povu Timor-Leste vota ba AMP. Tanba lulik sira iha Timor laran sempre rona Xanana ho Taur Matan Ruak.
Nune’e, Prezidente AMP, Kay Rala Xanana Gusmão haktuir iha komísiu katak, CNRT ho PLP la simu partidu KHUNTO nu’udar orgnizasaun Arte-Marsial, maibé partidu ne’ebé ho komprimisiu atu dezenvolve nasaun ne’e.
Tuir Xanana, atu hametin unidade nasional laós haree ba organizasaun, maibé nuda’ar partidu timoroan hodi hakuak malu hametin politika unidade nasional.
Tanba ne’e, partidu tolu ne’ebé hamutuk iha AMP iha komprimisiu atu defende riku-soin no defende dignidade povu no tane lisan Timor-Leste.
