Lista Kandidatura AMP: Xanana 1, Taur 2, Berta 3 Featured

By Jacinto Xavier Fevereiru 23, 2018 3422
Lideres AMP Lideres AMP

DILI: Prezidente Partidu Congresso Nacional Reconstrução Timor-Leste (CNRT), Kay Rala Xanana Gusmão, anunsia naran lista kandidatura husi koligasaun Aliansa Mudansa ba Progresu (AMP), ne’ebé atu sai membru Parlamentu Nasionál.

Husi lista ne’ebé anunsia liu husi telekonferensia ne’e, Xanana Gusmão maka númeru dahuluk, tuir Taur Matan Ruak husi Partidu Libertasaun Populár (PLP) daruak no datoluk maka Armanda Berta husi partidu KHUNTO.

“Lista únika kandidatura parlamentu nasionál númeru dahuluk mak ha'u rasik Kay Rala Xanana Gusmão, daruak mak Taur Matan Ruak no númeru datoluk mak Armanda Berta”, deklara Xanana via telekonferensia, iha Centro Convenção Dili (CCD), horisehik.

Iha fatin hanesan, portavós AMP, Taur Matan Ruak hatete, lista kandidatura haree ba buat rua. Primeiru, haree kadeira 35 iha Parlamentu Nasionál, tanba ne’e partidu CNRT sei hetan kadeira 22, PLP 8 no KHUNTO 5 ne’e hanoin ida atu kontinua asegura kadeira iha PN.

Alende ne’e, asegura kadeira 35 no hahú fali husi lista númeru 36 to’o 90, ne’e partidu CNRT hetan 19, PLP 18 no KHUNTO mós hetan 18. Tanba ne’e, prontu hotu ona hein atu ba aprezenta iha Tribunál Rekursu, iha tempu badak.

Bloku AMP kompostu husi partidu tolu hanesan CNRT, PLP no KHUNTO halo konferénsia nasionál dala ida de’it, maibé halo keta-ketak. Partidu CNRT nian halo iha CCD, PLP nian halo iha sede Nasionál Metiaut no KHUNTO nian halo iha Kanosa Haas-Laran.

Hafoin konferénsia nasionál husi partidu tolu ne’e remata, iha tuku 15:00 lokraik, partidu tolu ne'ebé koliga ho naran AMP ne’e halo konferénsia nasionál konjuntu hodi halo desizaun armonizasaun ba aliansa Pre-eleitorál AMP nian antes hakat ba eleisaun antesipada.

Entretantu, Sekretáriu Jerál partidu CNRT, Francisco Kalbuadi Lay hatete, tuir lei eleitorál partidu ka aliansa ida atu kompete iha eleisaun tenke ba rejistu iha Tribuna Rekursu.

Tanba ne’e, partidu tolu ne’e halo ona konferénsia nasionál hodi deside halo aliansa pre-eleitorál antes ba eleisaun antesipada hodi legaliza naran AMP, inklui aprova mós sigla no símbolu ka bandeira ne’ebé sei lori ba eleisaun.

Alende ne’e, Xanana Gusmão fó orientasaun polítika ba kuadru no militante AMP nian atu hadook-aan husi hahalok aat sira ne’ebé akontese ona simu osan no fó osan atu hetan votante.

Nia dehan, AMP la'ós di'ak liu no la aat liu partidu sira seluk iha senáriu polítika Timor nian, partidu koligasaun ne’e tenke servisu makaas hodi hatudu katak AMP mós bele.

Iha problema balun ne'ebé baibain halo see kotuk ba malu ne’e iha asuntu rua fundamentál ne’ebé partidu sira presiza hala’o no haree tuir, lei ne’ebé estabelese hodi kumpre prazu ba aprezentasaun órgaun kompetente iha prosesu eleitorál nian.

Tanba ne’e, tuir lei AMP tenke aprezenta koligasaun ne’e ba órgaun sira ne’ebé iha kompeténsia atu fó lejitimidade ba propózitu polítiku ne’e.

“Iha kampaña eleitorál ne’e ha'u lakohi haree militante AMP nian ba halo intimidasaun ka terrór ba povu, liu-liu ba militante partidu seluk hodi hetan eleitór”, dehan Xanana.

Iha prosesu eleitorál ne’e, kuadru AMP nian sei halo buat barak oinsá dezeña estratéjia programa partidu nian no kuadru sira husi partidu tolu oinsá atu halo mobilizasaun militante iha baze to’o nasionál.  

Rate this item
(0 votes)

Independente Digital TV