Lider sira Tenke Halakon Egoízmu Polítika Featured

By Cristina Ximenes Jullu 25, 2018 6680
FONGTIL FONGTIL

DILI: Impase polítika ne’ebé agora daudaun mosu iha nasaun ne’e tanba egoízmu husi polítiku na’in sira. Tanba ne’e, lider sira tenke hatudu ‘fuan boot’ hodi tuur hamutuk buka solusaun ne’ebé di'ak liu hodi solusiona problema polítika iha rai laran.

Haree ba situasaun polítika iha rai laran, Forum Organizasaun Naun Governamentál Timór Leste (FONGTIL) ho membru hamutuk 348 ezije ba VIII Governu Konstitusionál, Parlamentu Nasionál, Prezidente Repúblika no lideransa nasionál hotu hodi egoízmu polítika no tuur hamutuk ko’alia ba malu.

“Lideransa nasionál hotu tenke husik sira nia egoísta polítika hodi tuur hamutuk ko’alia ba malu, nune’e bele hetan solusaun ba inserteza polítika ne’e”, dehan Diretór Ezekutivu FONGTIL, Daniel Campos do Carmo, liu husi konferénsia imprensa, iha sede FONGTIL, Kaikoli-Dili, horisehik.

Nia hatutan, husu ba partidu polítiku sira hotu ne’ebé iha asentu parlamentár atu husik egoísta polítika ne’ebé defende de’it interese pozisaun no husu atu konsentra ba programa ne’ebé governu aprezenta.

“Ami husu ita boot sira, atu iha sensibilidade ba problema sósiu-ekonómiku ne’ebé povu enfrenta tanba polítika ne’ebé ita boot sira halo durante ne’e lori konsekuénsia negativu ba povu nia moris”, tenik nia.

Entretantu, relasiona ho lista membru governu ne’ebé seidauk simu pose, Diretór Ezekutivu Asosiasaun HAK, Manuel Monteiro hateten, hasai sira rai la nabeen no tasi sei la sa'e.

Tanba ne’e, Prezidente Repúblika kansela lista na’in sia ne’e la signifika sira na’in sia ne’e komete hotu kazu korrupsaun, koluzaun no nepotizmu (KKN), tanba lista balun ne’e imorál.

“Ita hakarak hamoos, ita hakarak hadi’a maka hahú hasai lista na’in sia troka ho ema seluk”, tenik nia.

Nia hatutan, lista imorál ne’e signifika goza ema nia oan feto arbiru, kaben na’in ona maibé depois ba goza ema nia oan klosan ne’e imorál. Ba iha públiku halo sasán sira ne’ebé la tuir étika, morál, lei bandu, relijiaun bandu, kultura bandu.

Nia hateten, lista sira ne’e balun la'ós kazu korrupsaun maibé balun imorál. Tanba ne’e, Prezidente Repúblika hakarak karik hamoos governasaun ida sai espellu no sai lisaun ba jerasaun foun ne’e para aktu imorál sira labele akontese tan ona.

Rate this item
(0 votes)

Independente Digital TV