Sábadu, 23 Outubru 2021 | Login
PN Retira Ajenda Ba Eleisaun Komisáriu KAK

PN Retira Ajenda Ba Eleisaun Komisáriu KAK Featured

DILI: Meza Parlamentu Nasionál liu husi reuniaun plenária, Segunda (1/10), ajenda períodu orden atu halo eleisaun ba Komisáriu Komisaun Anti Korrupsaun (KAK), maibé liu husi bankada FRETILIN husu atu retira hodi buka figura konsensual.

Ajenda eleisaun ba Komisaun KAK ne’e ba dala hitu ona maibé seidauk bele realiza tanba FRETILIN kontinua insiste loke diálogu entre bankada parlamentár.

Presidente Bankada FRETILIN, Aniceto Guterres hatete, FRETILIN iha Parlamentu Nasionál iha inisiativa no boa vontade hodi tuur hamutuk hodi buka solusaun ba komisáriu KAK nian.

Nia hatutan, Bankada FRETILIN la'ós lakohi kandidatura ne’ebé bankada maioria aprezenta ona, maibé hakarak Komisáriu KAK ne’e independente atu labele sai hanesan instituisaun ne’ebé politizada. Presiza iha baze konsensu husi bankada sira.

“Imi kontinua tau ba ajenda (Bankada Governu) maibé kuandu laiha diálogu bankada parlamentár hodi hili figura konsensual, ami sei abandona liután asuntu ne’e”, tenik Aniceto, iha Uma Fukun PN, horisehik.

Aniceto hatutan, relatóriu anuál Prokuradoria Jerál Repúblika (PJR) 2014 nian hatete momoos katak iha problema institusionál entre Ministériu Públiku no KAK.

Kuandu KAK halo investigasaun nia rezultadu dala ruma la serve atu Ministériu Públiku uza hodi halo akuzasaun.

Tanba ne’e, iha momentu ne'ebá eis-Presidente PN, Vicente Guterres, husu ba bankada Parlamentár sira atu hili kandidatu ne’e mai husi Ministériu Públiku ka ema Prokuradoria Jerál Repúblika ida.

Ne’e duni, karik AMP sira kuandu aprezenta kandidatura ida mai husi Ministériu Públiku ho klase Primeiru, Bankada FRETILIN prontu sustenta hodi bele halo eleisaun.

Tanba ne’e, husu ba meza PN atu retira ajenda ne’e hodi fó oportunidade atu bankada sira halo diálogu hodi buka solusaun.

Iha fatin hanesan, Presidente Bankada Partidu CNRT, Duarte Nunes mós konkorda ideia husi FRETILIN hodi husu ba mesa retira tiha ajenda ba eleisaun Komisáriu KAK ne’e.

“Ha’u lori bankada CNRT prontu atu halo diálogu iha tempu ne’ebé de’it no iha fatin ne’ebé de’it atu ita buka solusaun ba problema ne’e”, dehan nia.

Nia hatete, opsaun kona-ba atu hili ema tenke mai husi Ministériu Públiku ho primeira klase, seidauk bele ko'alia maibé ne’e sei iha diskusaun hodi deside tuir lei tanba lei la hatete kandidatura tenke mai husi ne’e ba.

Ho hanoin hirak ne’e, Prezidente PN Interina, Maria Angelina Lopes Sarmento foti desizaun hodi retira ajenda ba eleisaun Komisáriu KAK hodi hein ajenda fali iha semana oin.

Read 7630 times
Rate this item
(0 votes)