“Kuandu Metinaru mak sai ona zona industria juventude sira sei hetan servisu barak liután, maibe ema mak la to'o atu atu servisu", dehan Sekretariu Jeral partidu FRETILIN, Mari Alkatiri, iha kampaña komisiu, iha postu administrativu Metinaru-Dili, Sabadu (29/4).
Nia hateten, Metinaru no Hera sei sai fatin industria, tan ne'e FRETILIN hahu halo ona estudu atu loke iha ne'ebá, maibe molok atu loke tama zona industria tenki prepara-aan ho ninia infrastrutura sira ne’ebe adeduadu para planu zona industria iha Metinaro tama, komunidade sira bele prepara-aan diak.
Alkatiri realsa, zona industria ne'ebe sei hala'o iha Metinaro sei okupa área tomak. Fatin ne'e sei dezenvolve buat barak husi seitor oioin atu benefisia povu.
Durante ne'e governu anterior nunka tau prioridade ba povu kbi'it laek nia moris. Ne'eduni, governu FRETILIN ne'ebe ukun fulan neen hanoin ona atu aselera planu sira ne'e.
Alkatiri dehan, kuandu FRETILIN manan iha eleisaun ne'e, Metinaru sei nabilan liu tan Oekusi, tanba zona industria sei hatama rendementu boot ba Estadu no mós ba povu. Tan ne'e, vota FRETILIN atu mehi ne'ebe FRETILIN planeia ona bele sai realidade ba tinan lima oin mai.
