FRETILIN Konsidera AMP Forma Bankada Inkonstitusionál Featured

By Jacinto Xavier Juñu 14, 2018 1802
FRETILIN FRETILIN

DILI: Partidu koligasaun Aliansa Mudansa ba Progresu (AMP) tuir planu sei ‘fahe-malu’ hodi estabelese bankada tolu iha Parlamentu Nasionál tuir ida-idak nia-partidu, hodi garantia funsionamentu partidu nian.

Maski nune’e, planu AMP nian hetan reasaun makaas husi bankada partidu FRETILIN.

Tuir deputadu FRETILIN, Antonino Bianco hatete, antes atu tama ba eleisaun antesipada partidu tolu CNRT, PLP no KHUNTO hahú halo ona koligasaun pre-eleitorál hodi kompete iha eleisaun.

Ne’e duni, iha eleisaun antesipada partidu tolu hamutuk sai bloku AMP, nune’e sira iha konsensu hodi avansa lista úniku hodi aprezenta ba Tribunál Rekursu hodi hetan aprovasaun.

“Iha eleisaun antesipada povu la vota ba CNRT, PLP no KHUNTO, maibé vota ba AMP”, dehan nia, iha Uma Fukun PN, horisehik.

Maibé, mai iha PN bloku ne’e deside fahe-malu hodi estabelese bankada ketak-ketak, ne’e kontra ona konstituisaun artigu 70 númeru (1). Tanba ne’e konsidera inkonstitusionál.

Hataan ba kestaun, Membru Jurisdisaun AMP, Carmelita Moniz hatete, partidu tolu hanesan CNRT, PLP no KHUNTO antes atu halo koligasaun pre-eleitorál, halo ona akordu eskrita hodi aprezenta ba CNE no koopera hamutuk Tribunál Rekursu (TR).

Iha karta ne’e ko’alia katak partidu tolu halo pre-eleitorál, maibé depois eleisaun remata mai iha PN sei fahe malu hodi harii bankada keta-ketak tuir akordu ne’ebé AMP halo.

Depois kuandu iha ona publikasaun husi Jornál Repúblika iha momentu ne’ebá laiha partidu polítiku ida mak kestiona.

Nia esplika, deputadu iha PN iha guia ida hodi hala’o funsaun hanesan reprezentante povu hodi halo debate ruma ne’e bazeia ba mata dalan rejimentu PN Artigu 11.

Bazeia ida ne’e, iha períodu hirak liu ba kuandu partidu ASDT no PSD halo koligasaun, sira estabelese bankada rua keta-ketak. Tanba ne’e, presedente hatudu hein la’o tuir de’it.

Iha fatin hanesan, deputadu FRETILIN, David Dias Ximenes hatete, ASDT no PSD ne’ebé uluk halo koligasaun, maibé fahe malu hodi harii bankada rua ne’e presedente ne’ebé la di'ak. Tanba ne’e, hanesan deputadu labele repete dala ida tan.

 

Rate this item
(0 votes)

Independente Digital TV