AMP Deklara Manan ona Antes Eleisaun Featured

By Jacinto Xavier Fevereiru 07, 2018 1372
Lider AMP sira Lider AMP sira

DILI: Bloku Aliansa Mudansa ba Progresu AMP fiar-aan katak, maski seidauk eleisaun maibé hetan ona vitória, bazeia ba númeru kadeira ne'ebá oras ne’e partidu tolu hetan iha Parlamentu Nasionál.

Ami hetan ona vitória iha Parlamentu Nasionál ho kadeira 35. Ba oin se ami hetan liu ida ne’e di'ak liután”, dehan portavós bloku AMP, Taur Matan Ruak, iha Hotel Novo Turismo, foin lalais ne’e.

Iha fatin ketak, Prezidente Bankada PLP, Fidélis Magalhães hatete, eleisaun antesipada (EA) ne’e halo lalais di'ak liu, tanba intensaun hakarak hakotu lalais impase polítika ida ne’e.

Ami seidauk rona husi Prezidente Repúblika kona-ba data sira ne’e, maibé ami husi AMP hanoin di'ak liu lalais, tanba ita hotu hakarak atu hakotu lalais impase polítika”, dehan nia, iha Uma Fukun PN, horisehik.

Eleisaun antesipada ne’e hanesan mekanizmu ida atu solusiona situasaun polítika ne'ebé la’o la di'ak, maibé kuandu prolonga fila-fali ne’e signifika katak buat hotu la’o di'ak.

Nia hatutan, razaun AMP hakarak eleisaun entesipada lalais, tanba durante ne’e hotu-hotu hakarak hakotu lalais impase polítika. Entaun, labele dada tan tempu naruk hodi konvoka eleisaun.

Hakarak dezenvolvimentu la’o di'ak presiza Orsamentu Jerál Estadu (OJE). Nune'e, iha eleisaun mai presiza PN no governu ne'ebé forsa atu bele garante programa no orsamentu iha Uma Fukun.

AMP agora ba iha eleisaun antesipada ne’e ami ba ho maioria absoluta. Iha ona kondisaun hodi garante estabilidade governativa. Hein de’it eleitór sira atu aumenta tan votu”, tenik nia.

Antes ne’e, iha propaganda halo ema barak duvida, maibé situasaun kontinua la’o povu hotu esklaresidu ona ho situasaun ne’e. Hein katak iha eleisaun ne’e povu bele investe liután sira nia votu mai AMP.

Alende ne’e, planu no programa AMP nian ba kampaña eleitorál iha eleisaun antesipada seidauk bele pronunsia, tanba seidauk to’o nia tempu. Maibé, promete sei kontinua Planu Estratéjiku Dezenvolvimentu Nasionál (PEDN) ne'ebé trasa daudaun ona.

Rate this item
(0 votes)

Independente Digital TV