Husi kazu dengue 3.050 ne’e, maioria rejista iha kapitál Dili ne’ebé hamutuk hotu 2013, tuir Manatutu ho kazu 159, Manufahi ho kazu 128, Baukau 125, Kovalima 113, Lautem kazu 104, Ermera 90, Likisa kazu 89, Aileu kazu 85, Viekek kazu 57, Ainaru kazu 43, Bobonaru kazu 41, Raeoa ho kazu 3.

“Husi dadus ne’e hatudu, kazu dengue espalla ona iha teritoriu timor-leste tomak, no kazu mate espalla ona iha munisipiu 9, ne’ebé kazu hamutuk sa’e ba 35,” informa, MS liu husi Karta Komunikandu ne’ebé Jornal INDEPENDENTE asesu, Domingu (13/03).

Munispiu 9 ne’ebé rejista ona kazu mate mak, Dili hamutuk hotu kazu 18 n e’ebé barak liu, tuir Ermera ho kazu 4,Kovalima kazu aumenta ba kazu 5, Aileu kazu 2, Ainaru kazu 2, Baukau kazu 1, Manatutu kazu 1, Manufahi 1, no Viekeke 1.

Alende ne’e, iha kapitál Dili postu Administrativu Dom Alexu kontinua reziska dengue aas liu ne’ebé mai ho númeru kazu 1.084, hafoin postu administrativu Kristu Rei  ho kazu 389, tuir postu Administrativu Na’in Feto 262, Vera-Cruz 234.

“Husi kazu ne’e hatudu, kada loron kontinua sa’e makaas iha Dili laran, nune’e loron ba  loron kazu sei espalla nafatin ba iha postu sira seluk,” MS subliña.

Ho ida ne’e, Ministériu Saúde kontinua informa ba públiku hotu, atu aprezenta aan iha fasilidade saúde sira ne’ebé besik bainhria sente isin manas ka laran sa’e, liman ain sikun moras, atu bele hetan atendimentu husi médiku sira. 

Husu mós ba autoridade munispiu inklui lokais, atu bele orienta komunidade hala’o limpeza jeral iha ida-idak nia suku inklui aldei tomak, fase tanke, bidon ka balde semana ida dala ida, limpeza roda aat sira, bazu aifunan atu susuk labele natolun.