DILI:Sekretáriu Ezekutivu designada ba CPLP, Zacarias Albano da Costa Agradese ba VIII Governu Konstituisional ne'ebé lidera husi Primeiru Ministru Taur Matan Ruak ne'ebé fó konfiansa hodi lidera Komunidade País sira Ko’alia Lian Português [CPLP).
Iha audiénsia ne’e, Eis Ministru Negósius Estranjeirus no Kooperasaun, Zacarias Albano da Costa aproveita agradese Xefe Governu ba konfiansa hosi Governu Konstitusionál da VIII nian ba kargu Sekretáriu Ezekutivu CPLP ba períodu tuir mai.
“Ha’u hakarak dehan, ohin ha’u mai hasoru señór Primeiru- Ministru para agradese ba konfiansa ne’ebé ke VIII Governu fó ba ha’u, atu sai nu’udar Sekretáriu Ezekutivu ba CPLP nian ba tinan 2021-2023 e posibilidade tinan rua tan 2023 to’o 2025,” dehan Sekretáriu Ezekutivu dezignadu ba CPLP, Zacarias Albano da Costa hafoin hasoru malu ho Primeiru Ministru Taur Matan Ruak iha rezidénsia Farol Segunda (10/05).
Iha reuniaun ne’e, Xefe Ezekutivu fó konsellu ba Sekretáriu Ezekutivu dezignadu ba CPLP kona-ba futuru CPLP.
“Ha’u sente enkontru ne’e pozitivu tebetebes, Señór Primeiru Ministru dehan sei fó apoiu tomak ba serbisu ne’ebé mak ha’u sei hala’o, sei fó apoia tomak ba serbisu ne’ebé presiza nesesidade CPLP nian,” tenik nia.
Kargu Sekretáriu Ezekutivu CPLP, foin ba dahuluk atu kaer husi Timor-Leste, dezde ezisténsia organizasaun ne’e, no kargu ne’e sei asumi, hafoin Simeira Xefe Estadu no Xefe Governu nian iha Luanda-Angola, loron 17 fulan jullu tinan ne’e.
Daudaun ne’e kargu Sekretáriu Ezekutivu kaer hosi Francisco Ribeiro Telles hosi Portugal.
Membru CPLP kompostu hosi, Angola, Brazíl, Cabo-Verde, Guiné-Bissau, Guine Equatorial, Mozambique, Portugal, Saun Tomé no Príncipe, no Timor-Leste.
Asistente Editor: Saturnina da Costa
