Xanana Hakarak Ratifika Tratadu FM Antes 30 Agostu Featured

By Domingos Gomes Juñu 28, 2019 1064
xanana xanana

DILI: Xefe Negosiadór Delimitasaun Fronteira Marítima, Kay Rala Xanana Gusmão, hato'o ona pedidu ba Parlamentu Nasionál (PN) atu ratifika dokumentu Tratadu Tasi Timor entre Timor-Leste ho Austrália, antes 30 Agostu 2019.

Nune’e, agora daudaun PN hahú halo ona preparasaun hodi bele simu dokumentu ofisial husi Governu atu bele diskute no ratifika.

Prezidente PN, Arão Noe de Jesus hatete, sira sei halo ajenda hodi ratifika atu bele em vigor, antes 30 Agostu 2019, tanba Austrália rasik disponivel ona atu ratifika. Ne’e duni, Timor-Leste mós sei la’o tuir, inklui halo alterasaun ba lei tolu.

“Ami hein governu atu halo aprezentasaun kona-ba ratifikasaun no alterasaun ba lei tributária, lei atividade petrolífera no lei fundu petrolíferu nian atu halo alterasaun no ajusta fali”, dehan nia, iha Palásiu Prezidensiál, Bairru-Pité, horisehik.

Nia afirma, Austrália mós iha faze preparasaun ona, tanba ne’e iha semana ne’e sira komesa ona prepara ekipa komisaun eventuál ida ba apresiasaun.

Dokumentu definisaun fronteira marítima entre Timor-Leste no Austrália ofisialmente asina ona iha Novaiorke 6 Marsu 2018, nune’e agora daudaun hein ratifikasaun husi Parlamentu nasaun rua nian atu bele em vigor.

FRETILIN Prontu Ratifika Mas...

Bankada opozisaun FRETILIN iha Parlamentu Nasionál prontu ratifika tratadu fronteira marítima ne’e, maibé presiza kooperasaun Governu nian atu fasilita uluk dokumentu atu estuda.

“Kleur ona ami husu Governu liu husi MRLAP atu entrega mós dokumentu Fronteira Marítima ne’e mai ami para atu estuda molok atu hakat ba ratifikasaun, maibé to’o ohin loron ami seidauk simu dokumentu ne’e”, dehan Vise-Prezidente Bankada FRETILINN, Deputadu Francisco Miranda Branco.

Tuir nia, dokumentu FM ne’e importante tanba FRETILIN hakarak hatene didi'ak ninia konteúdu loloos para bainhira ratifika mós nesesáriu duni.

Ne’e duni, Branco ezije dala ida tan ba Governu atu atende pedidu FRETILIN nian para bele estuda tuir tempu ho didi'ak, atu desizaun ne’ebé sei hatún iha loron ne’ebé termina bele didi’ak no loos.

“Interdependénsia órgaun soberania nian ne’e presiza iha kooperasaun no ajuda malu para bele hataan ba interese Estadu ninian. Tanba ne’e mak ami ezije para asesu ba dokumentu sira ne’e”, tenik nia.

Tuir nia, FRETILIN atu fó apoiu ba prosesu ratifikasaun FM, maibé dalan úniku liu mak presiza estuda uluk dokumentu sira ne’e para bele pronunsia buat ida loloos ho responsabilidade.

Rate this item
(0 votes)

Independente Digital TV