Sekretariu Estadu Protesaun Sivil, Domingos Mariano Reis hatete, bazeia ba lei numeru 7/2021 ne’ebé delega kompetensia ba SEPS hodi fó asistensia rekuperasaun ba vitima sira ne’ebé afeita ba dezastre naturais, tuir kategoria tolu ne’ebé iha hanesan, aat total, aat Kaman no aat natón.

Nia dehan, dezastre naturais iha 4 abril tinan 2021 sai referensia ba Timor-Leste no sai mós esperensia ba Timoroan sira.

“Vitima uma-kain hitu iha munispiu Dili ne’e, kategoria ba aat total iha uma kain ida (1), aat natón iha uma-kain ida no aat kamán iha uma-kain (5), husi postu administrative Cristo-Reis, Nai-feto no Vera Crus,”dehan Sekretáriu Estadu Protesaun Sivil iha edifisiu SEPS Kaikoli, Dili, tersa ne’e (29/04/25).

Governante ne’e hatutan, apoia ne’ebé governu fó nu’udar asaun solidariedade ba vitima sira.

Tanba ne’e, husu ba vitima afeitadu sira ne’ebé hetan ona apoiu rekooperasaun, bele konstrui fila-fali sira nia hela fatin.

“Husu ba inan-aman sira ne’ebé simu material rekuperasaun, no simu osan ne’ebé maske kiik maibé ida ne’e mak kbiit governu ida agora fó ba ita boot sira, ne’e asaun solidariedade ba ita boot sira, nu’udar dever, moral no polítika nonu governu nia, husu inan aman sira tenki harii fali kedas ita boot sira nia uma,” Katak Governante ne’e.

Iha fatin hanesan, vitima Ciania Mendith P. Fernandes senti kontenti tanba nia uma ahi han ona iha tinan 2023, maibé governu nafatin buka tuir nia povu hodi fó apoiu.

“Ami senti kontenti tebes, maske ami nia uma ahi han ona iha tinan rua ba kotuk (2023), maibé governu sei buka tuir nafatin nia ema ne’ebé sira, no ami mós agradese ba governu ba buat ne’ebé ami simu husi governu,” dehan Vitima ne’e.

Enkuantu, total vitima iha teritoriu laran tomak ne’ebé SEPS apoia ona rekuperasaun hamutuk uma-kain 497. Husi dadus ne’e katgoriza ba aat total iha 104, aat natón iha 69 no aat kamán 311.

Enkuantu, osan ba apoiu rekuperasaun ba vitima afeitadu 497 ne’e hamutuk  $354.950.