Reitór UNTL, João Martins hateten, oportunidade ba veteranu nian oan sira di’ak tebes, tanba governu mós hanoin ba veteranu sira nia terus no luta ba nasaun ida-ne’e, ho ida-ne’e sira nia oan iha direitu atu hetan oportunidade hodi assesu ba UNTL.

“Ita husu ba alin sira husi veteranu nia oan sira atu aproveita didi’ak, tenke estuda maka’as, nune’e oportunidade labele husik abandona deit. Ha’u labele ko’alia kona-bá veteranu nia oan sira hapara sira nia estudu iha dalan klaran hodi la fó espasu ba ema seluk, tanba ita seidauk iha estudu ida hodi halo analiza estatistika katak eskola to’o de’it iha klaran para, ida ne’e ita seidauk hasai konkluzaun,” nia hateten iha salaun city 8 Manleuana, Kinta (02/03).

Ema barak mak hahu estudu depois to’o iha dalan klaran la konsege termina tanbá iha razaun barak maske nia veteranu nia oan ka ema baibain maibé dalaruma ekonomia la sufisiente.

Tanba ne’e, labele espekula de’it maibé tenke iha dadus mak bele ko’alia, maibé UNTL nafatin enkoraza atu estudante sira husi veteranu nia oan, populasaun jerál no joven sira hotu bainhira tama iha UNTL tenke uza oportunidade ida ne’ebé mak di’ak nune’e labele lakon oportunidade ida-ne’e.

Maski fatin ne’ebé sira hetan ne’e hasai tiha ema na’in 20 ka 30 nia fatin tanba ne’e UNTL husu nafatin ba sira, hodi aproveita oportunidade másimu hodi termina sira nia estudu, atu nune’e di’ak ba sira nia an no ba sira nia familia no nasaun ida-ne’e.