Iha Segunda (28/06) Prezidente Repúblika konvoka reuniaun ho KSDS no KE hodi diskuti kona-ba pedidu estensaun EE husi governu. Iha reuniaun ne’e membru KSDS no KE rekomenda ba PR atu husu tan estensaun EE ba PN.
“Konsiderasaun boot liu mak agora daudaun ne’e virus Delta ho Alfa ne’ebé komesa espalla nasaun barak ona no informasaun ne’ebé ita simu katak virus Delta mós hahú tama Indonézia, tanba ne’e mak ohin governu halo pedidu mai no konsellu rua ne’e reuniaun ona no rekomenda ba Prezidente Repúblika atu hato’o (pedidu estensaun EE) ba Parlamentu Nasionál,” informa Xefe Kaza Sivil Francisco Maria de Vasconcelos iha Palasiu Prezidensiál Bairu-Pite.
Kona-ba medida atu antisipa variante Delta tama TL, nia dehan, medida sira ne’e governu mak sei deside liu husi dekretu ida.
Iha fatin hanesan, Diretór Ezekutivu Forum Organizasaun Naun Governamentál Timor-Leste (FONGTIL), Daniel Santos do Carmo hatete, variante Delta perigu tan ne’e presiza aselera vasinasaun no PNTL tenke kontrola atividade englomerasaun sira, liu-liu festa.
“Buat ida ne’ebé ita hanoin atu husu governu mak liu-liu oinsá atu kontrolla másimu iha fronteira ne’e tanba virus Delta ne’e tama husi Kupang ne’e ita labele salva, entaun ida ne’e perigu,” dehan nia.
Entretantu, variante foun Covid-19 husi India ne’ebé hanaran varienta Delta (B1617.2) daudauk ne’e sai preokupasaun husi nasaun sira iha mundu, inklui Timor-Leste. Ho nune’e, Ministériu Saúde husu atu hametin seguransa iha area fronteira hodi bele evita variante Delta tama TL.
Tuir sientista husi Organizasaun Mundial Saúde (OMS), Soumya Swaminathan, variante Delta ne’ebé identifika iha India hahú sai variante ne’ebé globalmente dominante.
“Variante Delta iha hela viajen hodi sai variante globalmente dominante tanba ninia transmisilidade ne’ebé sa’e,” dehan Swaminathan ne’ebé públika iha www.detik.com iha 19 Juñu 2021, no jornal INDEPENDENTE sita iha Kinta (24/06).
Iha posibilidade mós atu Timor-Leste hetan variante foun Covid-19, tan ne’e Ho ameasa variante foun ne’e tanba nasaun barak iha mundu mós hetan ona.
Diretora Jeral Prestasaun Saúde ne’ebé mós nu’udar Vise Kordenadora Sentru Integradu Jestaun Krize (SIJK), Odete da Silva Viegas husu atu hametin seguransa iha fronteira hodi evita variante foun ne’e tama.
Aleinde taka fronteira, nia hatutan, dalan seluk hodi evita variante foun ne’e mak liu husi vasinasaun.
“Ita espera katak ita-nia komunidade sira hotu hakarak ho laran rasik atu simu vasina hodi nune’e ita mós bele proteze ita-nia aan bainhira variante ne’e tama iha ita-nia rai,” dehan nia iha Klinika Fatumeta, Kinta (24/06).
