Diretór Jerál Juventude, David Tomas de Deus hatete, progama parlamentu foinsae ne'e loke kle’ur ona maibe la iha kurikulum, tanba ne'e ohin hahú halo formasaun ba utilizasaun kurrikulum ba programa formasaun Parlamentu Foinsae nia.
"Objetivu husi ne'e mak ita iha programa ida naran Parlamentu Foinsae, programa ne'e la'o tiha ona iha 2010 mai to'o agora, durante ne'e ita halo formasaun maibé ita seidauk iha kurríkulum mak atur iha fatin. Tanba ne'e mak ho esforsu maka’as husi MJDAK apoiu husi UNICEF ita elabora ona kurríkulum ba programa Parlamentu Foinsae. Entaun kurríkulum ne'e iha ona no agora ita halo formasaun ne'e para atu partisipante sira iha koñesimentu di’ak hodi utiliza kurríkulum ba programa Parlamentu Foinsae ne'e ho diak liu tan," dehan Diretór jeral juventude, David Tomas De Deus, bainhira halo abertura ba formasaun kurrikulin parlamentu foinsae iha salaun Xanana Sport Center, Kuarta (28/02).
Nia hatutan, partisipante sira ne'ebé tuir formasaun refere, husi alumni Parlamentu Foinsae Timor Leste, sentru foin-sae sira Comoro, no staff MOYSAC. Portantu osan ne'e apoiu husi UNICEF ho total rihun $7.
Xefe Polítika Sosiál UNICEF Timor-Leste, Soumen Ray, hateten, iha kolaborasaun ho Ministériu Juventude, Desportu, Arte no Kultura (MJDAK), nune’e, UNICEF fó apoiu hodi hasa'e kapasitasaun parlamentu juventude nian.
"Ida ne'e inklui renova kurríkulum Parlamentu Juventude nian atu kobre tópiku oioin hanesan asuntu jéneru no prevensaun violénsia. Aleinde ne'e, apoiu ne'e inklui mós materiál imprensa no formasaun ba treinadór sira ba fasilitadór sira," nia informa.
Alende ne’e nia mós husu ba partisipante sira, tenke konkorda ho UNICEF katak, nu'udar lideransa iha futuru no potensialmente membru Parlamentu iha futuru, importante tebes ba membru Parlamentu Juventude sira atu komprende asuntu sira-ne'e no mós hametin sira-nia koñesimentu no abilidade iha área sira-ne'e.
Nu'udar foin-sa'e sira mós bele hala'o papel importante no influensia iha transformasaun sosiál hodi rezolve kestaun sira ne'ebé afeta adolesente no foin-sa'e sira iha nível lokál.
Tanba formasaun ne'e ninia objetivu mak atu fó abilidade ba fasilitadór sira atu fó formasaun ba membru parlamentu foin-sa'e sira ba tinan 2024-2025. Ida ne'e sei ajuda sira atu komprende sira-nia papél no responsabilidade, no bele fó rezultadu ba labarik, adolesente no joven sira seluk.
Aleinde ne'e, fasilitadór sira sei hetan formasaun atu fó apoiu ba adolexente no foin-sa'e sira, inklui ema ho defisiensia sira, uza kurríkulu ne'ebé espesialmente dezeña.
Portantu, kurríkulum Parlamentu Juventude nian kompostu husi komponente 11, inklui edukasaun sívika no sidadania, Edukasaun Bazika Skill Moris (LSBE), Jestaun Organizasaun, Anti-Korrupsaun, Análize Sosiál Ho Perspetiva Jéneru, Abilidade Debate no Argumentu, Abilidade Sesaun Enkontru no Plenária, No Seguransa Ict no Internét.
Kurrikulu ida-ne'e fornese matadalan ba formasaun membru Parlamentu Juventude sira iha munisípiu hotu-hotu iha Timor-Leste.
Enkuantu partisipante, Franzelina Alves da Cruz, nu’udar Alumni Parlamentu Foinsae Timor Leste, agradese tanba hetan oportunidade ida ne'e hodi tuir formasaun atu bele kapasita liu tan nia koñesimentu no sai fasilitadór ne'ebé di’ak iha futuru no la’o tuir kurríkulum ne’e rasik.
"Tanba formasaun ne’e hanesan treinamentu ida para bele sai fasilitadór ne'ebé di’ak. Entaun mai ami hanesan partisipante partisipa máximu iha treinamentu depois de ida ne'e, ami bele komprende kona-ba kurrikulum loloos Parlamentu Foinsae ninia no fim ami sai fasilitador ne'ebe di’ak iha futuru no la'o tuir kurikulum ne'ebe iha," nia agradese.
