Nia dehan, alargamentu estrada ne’e, ho medida luan iha metro 11.50 no nia naruk husi Luru Mata to’o ba iha Embaixada Amerika nia sorin hamutuk metro 180.

“Uma kain ne’ebé maka afeitadu ba iha alargamentu estrada ne’e hamutuk 72,  kompostu husi aldeia 03 iha uma-kain tolu nulu resin sia (39) no  husi aldeia 05 iha uma-kain afeitadu hamutuk tolu nulu resin tolu (33),” dehan nia ba Online INDEPENDENTE, iha nia knar fatin Sede Suku Fatuhada, Kinta (05/06/25).

Ba alargamentu ne’e, Xefe Suku ne’e hatutan, antes ne’e, iha loron 27 fulan-Maio, tinan ne’e, autoridade lokal hamutuk ho ekipa konjunta husi SEATOU fó sai ona avizu ba komunidade afeitadu sira atu bele konklui sira nia dokumentu iha Ministeriu Obras Públika.

Xefe Suku ne’e realsa liu tan katak, kona ba indeminizasaun nian, sei iha faze prosesu nia laran, maibé garante katak estadu sei fó indeminizasaun ba iha komunidade afeitadu sira, bainhira komunidade sira konklui ona dadus ka dokumentus konta bankaria nian.

Entretantu, ba alargamentu estrada ne’e, ekipa ekipa konjunta hamutuk ho autoridade lokal suku fatuhada nian, fó tempu loron 18 hahú husi loron 04 to’o 21 fulan-Juñu, tinan ne’e, atu komunidade sira hamamuk fatin refere, molok halo alargamentu ne’e.

Enkuantu, tuir  dadus, total populasaun iha Suku Fatuhada hamutuk rihun 18, ne’ebé mai husi aldeia lima iha suku refere.